Qoraqalpog‘iston Respublikasidagi umumta’lim muassasalarida ta’limni raqamlashtirish bo‘yicha bir qancha ishlar amalga oshirilmoqda. Jumladan, hozirgi kunda, tasarrufimizdagi jami 721 ta maktablar Internet tarmog‘iga ulangan bo‘lib, barcha maktablarimizda, ushbu global tarmoq orqali ishlaydigan “Elektron kundalik” avtomatlashtirilgan axborot tizimi, YaET-ERP boshqaruv tizimi va E-Huquqshunos elektron xujjat almashinuv tizimlari joriy etilgan va ta’limni raqamlashtirish sho‘balari xodimlari tomonidan qayd etilgan tizimlarning ishchi holati ta’minlab kelinmoqda va ularning kundalik ishlari vazirlikning ta’limni raqamlashtirish bo‘limi tomonidan muvofiqlashtirib borilmoqda.

2022-yil davomida, dastlab, Koreyaning Eksimbanki grantlari asosida 75 ta maktablarimizga 1 236 ta, keyinchalik esa, Vazirlar Mahkamasining 2021-yil                 29-noyabrdagi 716-qarori asosida jami 141 ta maktablarimizga 1 901 ta zamonaviy kompyuterlar etkazib berildi. Hozirgi kunda, ushbu kompyuterlar informatika sinf xonalariga o‘rnatilgan bo‘lib, lokal tarmoq orqali Internet tarmog‘iga ulangan va kerakli kontentlar o‘rnatilgan holda foydalanishga qabul qilindi. Maktablarimizdagi  eskirgan kompyuterlarni 2023 va 2024 yillar davomida zamonaviysiga almashtirish bo‘yicha rejaviy ishlar olib borilmoqda.

Hozirgi kunda, maktablarimizda, Maktabgacha va maktab ta’limi vazirligi tomonidan ishlab chiqilgan Smartland ta’lim platformasi hamda kitob.uz, edukids, maktab.uz, educare.uzedu.uz, idea.uzedu.uz, VR-360 sayoxat va artshop.uzedu.uz kabi maxsus internet resurslari joriy qilingan bo‘lib, bulardan foydalanish bo‘yicha o‘qituvchi va o‘quvchilarga keng targ‘ibot ishlari olib  borilmoqda.    

Xalq taʼlimi vazirining 2022-yil 31-maydagi 178-son buyrug‘ida belgilangan vazifalar ijrosini taʼminlash bo‘yicha Qoraqalpog‘iston Respublikasi Maktabgacha va maktab ta’limi vazirligi tasarrufidagi 162 ta umumtaʼlim maktablariga “O‘zbeko‘quvavtomatika” MCHJ filiali tomonidan 4 va 7 talik Wi-Fi routerlarni o‘rnatish ishlari olib borilmoqda. Bundan tashqari, pudratchi tashkilot tomonidan maktablarimizga mikrotik qurilmalari o‘rnatish ishlari ham bosqichma-bosqich olib borilmoqda. Wi-Fi routerlari asosan tegishli maktablarning STEAM sinf xonalari(kimyo, biologiya, fizika, matematika, chet tillari va texnologiya)ga yaqin bo‘lgan koridor shiftiga, belgilangan tartib bo‘yicha o‘rnatilmoqda.

Maktabgacha va maktab ta’limi vazirligining Raqamlashtirish Boshqarmasi boshchiligida ta’limni raqamlashtirish bo‘yicha olib borilayotgan barcha ishlar ta’lim sifatini yanada oshirishga qaratilgan bo‘lib, endigi maqsadimiz, maktablardagi STEAM sinflarining kerakli AKT qurilmalari bilan jihozlanganlik darajasini oshirishga va shu orqali dars jarayonlarida milliy elektron platformalardan va kontentlardan keng foydalangan holda o‘quvchilarimiz uchun darslarning yanada qiziqarli o‘tishiga erishishdir.