Вазир жамғармасида 100 фоизлик натижа қайд этган устозимиз Андижон вилояти Шаҳрихон туманидаги 44-ИДУМнинг олий тоифали биология фани ўқитувчиси Дилбархон Ғуломова.

14 йилдан бери ўқувчиларга билим бераётган Дилбархон Ғуломова ўқувчилик давриданоқ Республика олимпиадаларида ғолибликни қўлга киритиб, Ўзбекистон Миллий университетига имтиёз асосида ўқишга қабул қилинган. 

У 2018 йил “Йил ўқитувчиси” республика кўрик танловининг 3-ўрин соҳиби бўлган. 2021 йил «Эл-юрт умиди» жамғармаси нинг стипендиати сифатида Санкт- Петербургнинг А.И.Герцен номидаги Педагогика университетида малака ошириб қайтган. 

Дилбар Ғуломованинг ўқувчилари ҳам биология фанидан вилоят олимпиадаларида ғолибликли қўлга киритиб, Тиббиёт олийгоҳларига юқори балл билан ўқишга қабул қилинмоқда. 

Дарвоқе, шу кеча кундузда Дилбар Ғуломованинг ойлик маоши 12,6 млн сўмни ташкил қилса, Вазир жамғармасининг II босқичидан муваффақиятли ўтган тақдирда маоши 17 млн сўмдан ошиши бизни қувонтирди. 

“Вазир жамғармасига эълон бўлганидаёқ бу устама аниқ меники бўлишига ишонгандим ва насиб қилса кейинги босқичдан ҳам мувафаққиятли ўтсам, ниятимга етаман. Устозларга ўз устиларида ишлашдан тинмасликларини, бу ўзининг ижобий самарасини беришини ишонч билан айта оламан”, — дейди у.

Дарвоқе, у билан боғланганимизда айни дамда Тошкентдаги Абу Али Ибн Сино номидаги ихтисослаштирилган мактабдан қизини олиб қайтаётгани, қолган 2 фарзанди эса Андижондаги Президент мактабида таҳсил олишини айтиб ўтди. 

Ҳақиқий ўқитувчининг фарзандида бундан паст ютуқ бўлмаслиги аниқ. Фурсатдан фойдаланиб, Дилбар Ғуломова ва у сингари юқори натижаларни қайд этган барча устозларни муборакбод этамиз.