Мойнақ райны халық билимлендириӯ бөлимине қараслы 6-санлы улыӯма орта билим бериӯ мектебинде «Миллетлер дослығы – тынышлық тиреги » сүрени астында илаж өткерилди.

Илаж даўамында оқыӯшылар өзбек, қарақалпақ, қазақ, түркмен, рус ҳәм корейс миллети ўәкиллериниң үрп-әдетлерин өзинде сәўлелендирген  ҳалда миллий кийимлер көргизбесин көрсетти. Усы миллетлердиң өзине тән үрп-әдет ҳәм дәстүрлери туўралы қызықлы мағлыўматлер берди.

Концерт бағдарламасында миллий қосық ҳәм аяқ ойынлар шеберлик пенен атқарылды. Бир-биринен қәбилетли қызлардың шығыўлары тамашагөйлерде айрықша тәсир қалдырды ҳәм ҳақыйқый кеңпейиллик орталығын жаратты.

Қарақалпақ халқы әзелден өзиниң миллий үрп-әдетлери, салт-дәстүрлери, бай аўызеки дөретпелери, бай әдебий мийрасларына, жыраўшылық, бақсышылық, сазендешилик, қыссаханлық, миллий аяқ ойынлары, балалар ойынлары, миллий өнерментшилик, кестешилик, зергерлик, қурақ қураў, қара үй соғыў ҳәм басқа да миллий мәдений байлықларына ийе болып, халқымыз елеге шекем оларды қәстерлеп сақлап келмекте.

Бундай илажлар оқыӯшы-жасларды миллий ҳәм улыўмаинсаныйлық қәдириятлар руўхында тәрбиялаўға, баслы байлығымыз болған халықлар дослығын үгит-нәсиятлаўға хызмет етиўи менен әҳмийетли.