Mámleketimizde 2023-jıl «Insanǵa itibar hám sıpatlı bilimlendiriw jılı»nda belgilengen áhmiyetli wazıypalar, atap aytqanda tálim-tárbiya  sistemasın basqıshqa alıp shıǵıwda mektepte tálim alıwı dawamında oqıwshılardıń bir kásip hámde eki shet tilin úyreniwlerin shólkemlestiriw boyınsha Ózbekstan Respublikası Prezidenti tárepinen alǵa súrilgen baslamalardı ulıwma orta bilim beriw mekteplerinde keńnen engiziw ilájların kóriw maqsetinde Qanlıkól rayonı hákimi orınbasarı hám xalıq bilimlendiriw baslıǵı basshılıǵında usı jıldıń 17-fevral kúni ulıwma orta bilim beriw mektepleriniń direktorları qatnasında rayonlıq 18-sanlı mektepte oqıwshılardı kásipke úyretiw hámde shet tillerin úyretiw boyınsha mektep hákimshiligi tárepinen islenip atırǵan  jumıslar barısı menen tanıstırıldı.

Mektepte ustaz pedagoglar tárepinen oqıwshılarǵa tereń tálim-tárbiya beriw menen bir qatarda olardı kásipke úyretiw jumısları álle qashan baslanıp ketkenligi kórildi. Atap aytqanda, er balalar ushın aǵashqa hám temirge islew beriw usılları, robototexnika dógeregi, kompyuter dizayn dógeregi, al qız balalar ushın qol ónermentshiligi yaǵnıy, toqıw, pishiw, quraq qurap úyreniw dógeregi, nan hám nan ónimlerin islep úyreniw, saz áspabların úyreniw, kitapxanlıq, inglis hám nemec tillerin úyreniw dógerekleri óz jumısların alıp barmaqta.

Tájiriybe almasıwǵa kelgen mektep direktorları mektepte oqıwshılardı kásip ónerge hám shet tillerin úyreniwge  baǵdarlaw boyınsha alıp barıp atırǵan jumıslardı bir qatar kózden ótkerip ózleriniń mekteplerinde  alıp barılıp atırǵan jumıslardı usı alǵan tájiriybesi tiykarında elede jetilistiriw pikirlerin atap ótti.

Tájiriybe almasıw jumısları qızıqlı hám mazmunlı bolıp ótti.