Qaraqalpaqstan Respublikası Xalıq bilimlendiriw ministrligi tárepinen tastıyıqlap berilgen grafik tiykarında usı jıldıń 16-fevral kúni Xojeli rayonındaǵı 14-sanlı mektepte mektep oqıwshıların kásipke úyretiw hám shet tillerin úyretiwge maqsetinde shólkemlestirilgen «Kásipke úyretiw orayı»nıń jumısları menen tanısıw hám tájiriybe almasıw maqsetinde Qanlıkól rayon hákimi orınbasarı, rayonlıq xalıq bilimlendiriw bólimi baslıǵı basshılıǵında ulıwma orta bilim beriw mektepleriniń direktorları orayda boldı hám orayda oqıwshılar menen sáwbetlesip, olar ushın jaratılǵan sharayatlar menen tanıstı.

Bilimlendiriw basshıları joqarıda atap ótilgen mektepte oqıwshılardı kásipke úyretiw hámde shet tillerin úyretiw boyınsha mektep hákimshiligi tárepinen islenip atırǵan jumısları menen keńnen tanıstı, ózlerine kerekli maǵlıwmatlar alıp, bir-biri menen pikir almasıp, ózleri basshılıq etip atırǵan mektepte de oqıwshılardı kásipke úyretiw hám shet tillerin úyretiwdi keńnen jolǵa qoyıwdı óz aldına maqset etip aldı.

Aytıw orınlı, bul orayda oqıwshı-jaslardı jámi 7 baǵdar boyınsha kásipke úyretiw belgilengen bolıp, sonnan, ustashılıq, shet tilin úyreniw, mobil telefon ońlaw, hayal-qızlar sháshtárezxanası, tigiwshilik hám konditer ónimlerin pisiriw sıyaqlı jónelisler boyınsha oqıwshılar kásipke baǵdarlanadı. Bunnan tısqarı, mektep aymaǵında qoyanshılıq, qusshılıqtı rawajlandırıw hám de ıssıxanada ónim jetistiriw jónelisleri boyınsha da kásip úyretiw belgilep alınǵan.