Жаслар арасында нәшебентлик иллетиниң тарқалыўына жол қоймаў, оның ақыбетинде жүзеге келиўи мүмкин болған  жынаятлардың алдын алыў мақсетинде усы жылдың 1-февраль күнинен 1-мартқа шекем жаслар арасында нәшебентликке қарсы гүресиў айлығы деп жәрияланып, орынларда бул бағдарда үгит-нәсият ҳәм профилактикалық илажлар өткерилмекте.

Нөкис районы халық билимлендириӯ бөлимине қараслы 4-санлы улыӯма орта билим бериӯ мектебинде өткерилген усындай илажға районлық ИИБ жумысларын муӯапықластырыӯ басқармасы Жас өспиримлер менен бирге ислесиӯ инспекторы, психолог майор У.Қудайбергенов, Н.Турдымуратова ҳәм Е.Диналиевлар, сондай-ақ, мектеп директоры М.Сарыбаев, руӯхыйлық-ағартыӯшылық ислери бойынша директор орынбасары Н.Бекмуратова ҳәм де мектеп оқыӯшылары қатнасты.

Илажда бул иллеттиң инсанның өмири ҳәм денсаўлығы ушын қаншелли қәўипли екенлиги ҳәм жаслар тәрепинен әмелге асырылатуғын көп ғана ҳуқықбузарлықларға, мине, усы иллет себеп болып атырғаны атап өтилди.

 Сондай-ақ, илаж даўамында нәшебентлик затлардан пайдаланыўдың адам денсаўлығына, оның социаллық статусына, жақын-жуўықлары менен қарым-қатнасына кери тәсирин тийгизетуғынлығы, буның ақыбети аўыр болатуғынлығы сөз етилди. Сонлықтан, бул машқала тек бизиң елимизди емес, ал пүткил дүнья жүзин үлкен тәшўишке салмақта. Оған қарсы гүресиў ҳәм алдын алыў бойынша халқымыз, соның ишинде, жасларымыз арасында кең көлемли үгит-нәсият жумыслары алып барылмақта.

–Жасларды жәмийетимизге жат болған қәўиплерден қорғаў, ана Ўатанға ҳүрмет ҳәм миллий қәдириятлар руўхында тәрбиялаў баслы ўазыйпалардан саналады. Бул бағдарда жаслардың бос ўақытларын мазмунлы өткериўге қаратылған үгит-нәсият илажларын турақлы түрде алып барыўмыз тийис -дейди мектептиң руӯхыйлық-ағартыӯшылық ислери бойынша директор орынбасары Н.Бекмуратова.

Илажда шығып сөйлегенлер, ғәрезсиз елимизде бул иллетке қарсы гүресиў бойынша алып барылып атырған илажларға тоқтап өтти ҳәм бәршени оған қарсы биргеликте гүресиўге шақырды.

Қатнасыўшылар қәнигелерден өзлерин қызықтырған сораўларға жуўап алды.