Búgingi kúnde mámleketimiz basshısı baslaması menen elimizde hayal-qızlardı hár tárepleme qollap-quwatlaw, olardıń sociallıq-ekonomikalıq hám siyasiy belsendiligin arttırıw, ilimiy jumıslarǵa tartıw, bántligin támiyinlew boyınsha keń kólemli reformalar ámelge asırılmaqta.

Birlesken Milletler Bas Assambleyasınıń 2015-jıl 22-dekabrdegi 70-sessiyasında 11-fevral «Ilim-pán tarawındaǵı hayallar hám xalıqaralıq qızlar kúni» belgilengen bolıp, 2016-jıldan baslap usı sáne dúnyanıń kóplegen mámleketleri qatarında Ózbekstan Respublikasında da keń belgilenip kelinbekte.

Usı múnásibet penen Qaraqalpaqstan Respublikası Ministrler Keńesiniń 2023-jıl 3-fevraldaǵı 09-08/12-02/97-sanlı májilis bayanlamasına tiykarlanıp barlıq ulıwma bilim beriw mekteplerinde bilim alıp atırǵan oqıwshı qızlar qatnasında hár túrli kórik-tańlawlar, viktorinalar, alım hayallar menen ushırasıw kesheleri ótkerilmekte.

Atap aytqanda, Taxtakópir rayonındaǵı 13-sanlı ulıwma orta bilim beriw mektebinde ilaj bolıp ótti.

Ilajdı baslanǵısh hayal-qızlar shólkemi baslıǵı A.Dauletmurtova basqarıp bardı hám jıynalǵanlardı xalıqaralıq bayram menen qutlıqladı.

Bunnan soń kóp jıllıq tájiriybege iye nuranıy ustaz P.Turmanova, mektep direktorı G.Ótexanova, qaraqalpaq tili ham ádebiyatı páni muǵallimi Q.Abdinaymovalar shıǵıp sóylep, elimizde hayal-qızlarǵa qaratılǵan itibar hám ǵamqorlıqlar haqqında aytıp, bul imkaniyatlardan jaslarımız nátiyjeli paydalanıwı kerekligine toqtap ótti.

Ilaj dawamında oqıwshılar ózlerin qızıqtırǵan sorawlarına juwaplar aldı.

Keshe mazmunlı hám qızıqlı bolıp ótti.

Tayarlaǵan: P.Ajimuratova