Мәмлекетимиз басшысы басламасы менен елимизде ҳаял-қызларды ҳәр тәреплеме қоллап-қуўатлаў, олардың социаллық-экономикалық ҳәм сиясий белсендилигин арттырыў, илимий жумысларға тартыў, бәнтлигин тәмийинлеў бойынша кең кѳлемли реформалар әмелге асырылмақта.

Бирлескен Миллетлер Бас Ассамблеясының 2015-жыл 22-декабрдеги 70-сессиясында 11-февраль «Илим-пән тараўындағы ҳаяллар ҳәм халықаралық қызлар күни» белгиленген болып, 2016-жылдан баслап усы сәне дүньяның кѳплеген мәмлекетлери қатарында Өзбекстан Республикасында да кең белгиленип келинбекте.

Усы мүнәсибет пенен Қарақалпақстан Республикасы Министрлер Кеңесиниң 2023-жыл 3-февральдағы 09-08/12-02/97-санлы мәжилис баянламасына тийкарланып барлық улыўма билим бериў мектеплеринде билим алып атырған оқыўшы қызлар қатнасында ҳәр түрли кѳрик-таңлаўлар, викториналар, алым ҳаяллар менен ушырасыў кешелери ѳткерилмекте.

Сондай-ақ, улыўма билим бериў мектеплеринде оқыўшы қызларды илим-пән тараўында өз мийнетлери менен белсендилигин көрсетип киятырған алым ҳаял-қызлардың мийнет жоллары менен таныстырыў мақсетинде ушырасыўлар, сораў-жуўаплар шөлкемлестирилмекте.

Усы мүнәсибет пенен Тахтакөпир районындағы 3-санлы улыўма орта билим бериў мектебинде "Илим – бахыттың гилти" атамасында илимпаз ҳаял-қызлардың қатнасыўында ушырасыў кешеси болып өтти.

Оған Өзбекстан Республикасы Илимлер Академиясы Қарақалпақстан бөлими, Гуманитар илимлер илим-изертлеў институтының Қарақалпақ әдебияты бөлими баслығы, филология илимлериниң докторы, профессор Зыяда Бекбергенова ҳәм доцент Арыўхан Утамбетовалар қатнасты.  Олар өзлериниң ерискен жетискенликлери, илим тараўындағы изленислери ҳаққында оқыўшы жасларға кең түрде айтып берди. Өз гезегинде оқыўшылар да қызықтырған сораўларына жуўаплар алды.

Ушырасыў барысында илимпаз Зыяда Бекбергенова өз авторлығындағы китаплардан мектеп китапханасына саўға етти.

Ушырасыў соңында мектептиң талантлы оқыўшыларының концерт бағдарламасы қойып берилди.