Өзбекстан Республикасы Президентиниң 2023-жыл 20-январь күни мектеплерде шет тиллерин ҳәм кәсипке үйретиў системасын раўажландырыў мәселелери бойынша өткерилген мәжилисинде берилген тапсырмаларды орынлаў мақсетинде  Хожели районы халық билимлендириў бөлимине қараслы 14-санлы улыӯма орта билим бериӯ мектебинде Кәсипке оқытыў орайы шөлкемлестирилген еди.

Мине, бүгин Тақыятас районлық Халық билимлендириӯ бөлими баслығы Қ.Бекбаулиевтың  басшылығында бөлимниң кәсипке бағдарлаӯ бойынша методистлери, мектеп директорлары тәжирийбе алмасыӯ мақсетинде усы Кәсипке оқытыў орайында болды ҳәм орайда оқыўшылар менен сәўбетлесип, олар ушын жаратылған шараятлар менен танысты.

Айтыў орынлы, бул орайда оқыўшы-жасларды жәми 7 бағдар бойынша кәсипке үйретиў белгиленген болып, соннан, усташылық, шет тилин үйрениў, мобил телефон оңлаў, ҳаял-қызлар шәштәрезханасы, тигиўшилик ҳәм кондитер өнимлерин писириў сыяқлы жөнелислер бойынша оқыўшылар кәсипке бағдарланады. Буннан тысқары, мектеп аймағында қояншылық, қусшылықты раўажландырыў ҳәм де ыссыханада өним жетистириў жөнелислери бойынша да кәсип үйретиў белгилеп алынған.