Xojeli rayonlıq xalıq bilimlendiriw bólimine qaraslı 20-sanlı ulıwma orta bilim beriw mektebinde túrkiy xalıqlar ádebiyatınıń kórnekli wákili, ózbek ádebiy tiliniń tiykarın salıwshısı, shayır hám mámleketlik ǵayratker, ǵázzel múlkiniń sultanı Áliysher Nawayınıń tuwılǵanına 582 jıl tolıwı múnásibeti menen «Ajdodlar nomi mangu barhayot» atamasında kórkem-ádebiy keshe bolıp ótti.

Áliysher Nawayınıń bay hám kóp qırlı dóretiwshiligi tek ǵana ózbek ádebiyatında emes, sonıń menen birge, dúnya ádebiyatında da salmaqlı orınǵa iye. Ásirese, «Hamsa» dástanı Nawayı dóretiwshiliginiń eń biyik shıńı bolıp tabıladı. Bul shıǵarma ózbek ádebiyatınıń dańqın dúnyaǵa kórsetip, jáhán ádebiyatınıń eń jaqsı úlgileriniń birine aylandı.

Nawayınıń dóretiwshiligine názer awdarsaq, poeziyanıń 16 túrli janrında dóretiwshilik etkenligin kóriw múmkin. Bular ǵázzel, rubayı, tuyıq, fard, qita, muhalles, musaddes hám t.b. Usınday janrlarda Nawayı sıyaqlı dóretiwshilik etken shayırlar derlik joq. Ullı shayır qosıq jazǵanda tek ǵana ózbek tiliniń emes, al basqa da tillerden nátiyjeli paydalanǵan.

Ilaj dawamında mekteptiń talantlı jasları atqarıwındaǵı ullı tulǵamızdıń ómiri hám dóretiwshiligi sáwlelengen saxnalıq kórinisleri jáne koncert baǵdarlaması menen dawam etti.