Keyingi jıllarda bilimlendiriw tarawında ámelge asırılıp atırǵan xalıqshıl reformalar hám muǵallimlerdi sociallıq qollap-quwatlawǵa baylanıslı alıp barılıp atırǵan nızamshılıq ózgerisler bilimlendiriw pidayılarınıń miynetin jáne de materiallıq qollap-quwatlawda úlken áhmiyetke iye.
Atap aytqanda, xalıq bilimlendiriwi sistemasındaǵı ulıwma orta bilimlendiriw mekteplerinde jumıs islep atırǵan intaker hám qábiletli muǵallimler tómendegishe hár aylıq ústeme hám qosımsha tólemlerge iye bolıp kelmekte:

Ózbekstan Respublikası Prezidentiniń 2021-jıl 11-yanvardaǵı «Alıs aymaqlardaǵı byudjet shólkemlerine qánigeli kadrlardı tartıw ilajları haqqında»ǵı PQ-4940-sanlı qararına muwapıq:
bir hákimshilik-aymaqlıq birlikler sheńberinde basqa rayon hám qalalardan kelip jumıs isleytuǵın muǵallim-pedagoglardıń bazalıq tarif stavkalarına 50 procent;
basqa hákimshilik-aymaqlıq birlikten kelip jumıs islep atırǵan muǵallim-pedagoglardıń bazalıq tarif stavkalarına 100 procent ústeme;

Ózbekstan Respublikası Prezidentiniń 2021-jıl 19-maydaǵı «Ózbekstan Respublikasında shet tillerin úyretiwdi ǵalaba en jaydırıw jumısın sapa jaǵınan jańa basqıshqa alıp shıǵıw ilajları haqqında»ǵı PQ-5117-sanlı qararına muwapıq:
Bilimlendiriw mákmeleriniń keminde S-1 dárejedegi milliy hám yamasa oǵan teńestirilgen sáykes dárejedegi xalıqaralıq tán alınǵan sertifikatına iye shet tili (inglis, francuz, nemis, ispan, italyan, arab, qıtay, yapon, koreys, túrk, parsı, pushtu, dari, urdu, hind) muǵallimlerine olardıń bazalıq tarif stavkasına salıstırmalı hár aylıq 50 procent ústeme;

Ózbekstan Respublikası Prezidentiniń 2019-jıl 3-maydaǵı «Qábiletli jaslardı anıqlaw hám joqarı maman kadrlardı tayarlawdıń úzliksiz sistemasın shólkemlestiriw ilajları haqqında»ǵı PQ-4306-sanlı qararına muwapıq:
Xalıqaralıq olimpiadalar jeńimpazların tayarlaǵan muǵallimler hám bilimlendiriw mákemeleriniń direktorlarına gezektegi oqıw jılı ushın direktor fondınan altın, gúmis hám bronza medallar boyınsha tiyisli túrde 150, 175, 200 procent;
Bilimlendiriw mákemelerinde muǵallim bolıp islep atırǵan:
xalıqaralıq olimpiadalar jeńimpazlarınıń lawazımlıq miynet haqısına 150 procent;
tiykarǵı olimpiadalardıń respublikalıq basqıshı jeńimpazlarınıń lawazımlıq miynet haqısına 100 procent ústeme;

Ózbekstan Respublikası Prezidentiniń  2010-jıl 1-apreldegi «Awıllıq jerlerdegi balalar sportı obektlerinde bánt bolǵan hayal sport trenerleriniń miynetin xoshametlew ilajlar haqqında»ǵı PQ-1315-sanlı qararına muwapıq:
awıllıq jerlerdegi ulıwma bilimlendiriw mekteplerinde denetárbiya muǵallimi jáne sport treneri bolıp islep atırǵan hayal-qızlardıń tarif stavkalarına hár ayda 15 procent ústeme;
Ózbekstan Respublikası Prezidentiniń 2022-jıl 11-maydaǵı «2022-2026-jıllarda xalıq bilimlendiriwin rawajlandırıw boyınsha milliy baǵdarlamanı tastıyıqlaw haqqında»ǵı PP-134-sanlı qararına muwapıq:
xalıqaralıq standartlar talaplarına juwap beretuǵın milliy bahalaw sistemasında alınǵan sertifikatqa iye bolǵan pedagog kadrlarǵa – olardıń tarif stavkasına qaray 50 procent ústeme;

Ózbekstan Respublikası Ministrler Kabinetiniń 2022-jıl 2-avgusttaǵı «Xalıq bilimlendiriw ministri fondınıń jumısın shólkemlestiriw ilajları haqqında»ǵı 425-sanlı qararına muwapıq:
kásiplik sheberligin bahalaw boyınsha ótkerilgen test hám sáwbet nátiyjelerine bola eń joqarı ball toplaǵan qánigeli pedagog kadrlarǵa miynetke haqı tólewdiń eń az muǵdarınıń 5,5 esesi muǵdarında ústeme;

Ózbekstan Respublikası Ministrler Kabinetiniń 2021-jıl 12-oktyabrdegi «Óz aldına oqıtıwǵa mútáj bolǵan balalarǵa bilim beriwge baylanıslı normativlik–huqıqıy hújjetlerdi tastıyıqlaw haqqında»ǵı 638-sanlı qararına muwapıq:
inklyuziv oqıw klasslarınıń oqıwshılarına miynetiniń ayrıqsha sharayatları ushın hár ayda tólenetuǵın ústeme haqı klassta óz aldına oqıtıw zárúrligi bolǵan bir bala ushın lawazımlıq aylıǵınıń 10 procentinen – 40 procentine shekem ústeme;

Ózbekstan Respublikası Ministrler Kabinetiniń 2019-jıl  7-iyundegi «Alıs aymaqlarda jaylasqan ulıwma orta bilimlendiriw mákemelerinde jumıs islep atrıǵan pedagog xızmetkerlerdiń miynetin bunnan bılay da xoshametlew haqqında»ǵı 471-sanlı qararına muwapıq;
alıs aymaqlarda jaylasqan ulıwma orta bilim beriw mákemelerinde basqa da aymaqlardan kelip jumıs islep atırǵan pedagog xızmetkerlerdiń bazalıq tarif stavkalarına jumıs stajınan kelip shıǵıp 10 procentten – 50 procentke shekem ústeme;

Ózbekstan Respublikası Ministrler Kabinetiniń 2019 –jıl 30-sentyabrdegi «Ulıwma orta bilimlendiriw mákemeleriniń órnek kórsetken xızmetkerlerin materiallıq xoshametlew tártibin jetilistiriw haqqında»ǵı 823-sanlı qararına muwapıq:
Direktor fondınıń qarjıları esabınan Ulıwma bilimlendiriw mákemeleriniń xızmetkerlerine sonıń ishinde, pedagog, psixolog hám kitapxana xızmetkerleriniń bazalıq tarif stavkalarına salıstırmalı 10 procentten – 40 procentke shekem ústeme;

Ózbekstan Respublikası Ministrler Kabinetiniń 2019-jıl 24-dekabrdegi «Ilim hám bilimlendiriw tarawındaǵı mámleketlik shólkemlerde ilimiy, ilimiy–pedagogikalıq hám miynet etiwdegi ilimiy dárejege iye xızmetkerlerge qosımsha haqı tólew tártibi haqqında»ǵı  1030-sanlı qararına muwapıq:
Ilim hám bilimlendiriw tarawındaǵı mámleketlik shólkemlerde (keyingi orınlarda shólkem dep ataladı) ilimiy–pedagogikalıq hám miynet etiw menen shuǵıllanatuǵın xızmetkerlerdiń lawazımlıq miynet haqısına qaray:
ilim kandidatı yamasa filosofiya doktorı (PhD) (yamasa sırt ellerde olarǵa teńlestirilgen dárejeler) (keyingi orınlarda filosofiya doktorı dep ataladı) ilimiy dárejesine iye bolǵanlar ushın – lawazımlıq miynet haqısınıń 30 procentine shekem ústeme;
ilim doktorı (Doctor of Science) (yamasa sırt ellerde oǵan teńlestirilgen dáreje) (keyingi orınlarda ilim doktorı dep ataladı) ilimiy dárejesine iye bolǵanlar ushın – lawazımlıq miynet haqısınıń 60 procentine shekem ústeme;

Ózbekstan Respublikası Ministrler Kabinetiniń 2008-jıl 3-yanvardaǵı «Húrmetli ataqlardıń iyelerine tólemlerdi tayınlaw hám ámelge asırıw tártibi haqqındaǵı rejeni tastıyıqlaw haqqında»ǵı 2-sanlı qararına muwapıq:
«Xalıq» hám «Xızmet kórsetken ǵayratker» húrmetli ataq iyelerine bazalıq esaplaw muǵdarınıń 3 esesi;
«Xızmet kórsetken» húrmetli ataǵınıń iyelerine (qalǵan kásipler boyınsha) bazalıq esaplaw muǵdarınıń 1,6 esesi muǵdarında ústeme;

Ózbekstan Respublikası Ministrler Kabinetiniń 2005-jıl 21-dekabrdegi «Xalıq bilimlendiriwi xızmetkerleriniń miynetine haqı tólewdiń jetilistirilgen sistemasın tastıyıqlaw haqqında»ǵı  275-sanlı qararına muwapıq:
a) klasstaǵı oqıwshılardıń sanına karay klass basshılıǵı ushın miynetke haqı tólewdiń eń az muǵdarına salıstırmalı 26,4 procentten –  52,8 procentke shekem klasstaǵı oqıwshılardıń sanına qaray tómendegishe:
15 oqıwshıǵa shekem – 26,4 procent;
16 dan 20 oqıwshıǵa shekem – 31,6 procent;
21 dan 25 oqıwshıǵa shekem – 36,9 procent;
26 dan 30 oqıwshıǵa shekem – 42,1 procent;
31 hám onnan kóp oqıwshı bolǵanda – 52,8 procent;
b) dápterlerdi hám jazba jumıslardı teksergeni ushın oqıwshılar sanınan kelip shıǵıp miynetine haqı tólewdiń eń az muǵdarına salıstırmalı 8,8 procentten – 17,6 procentke shekem;
v) informatika kabinetiniń basshılıǵı ushın miynetke haqı tólewdiń eń az muǵdarına salıstırǵanda 17,6 procent;

Ózbekstan Respublikası Ministrler Kabinetiniń 2003-jıl 11-avgusttaǵı «Ózbekstan Respublikası Ministrler Kabineti janındaǵı Tashkent islam universiteti pitkeriwshilerin qarjılay qollap-quwatlaw haqqında»ǵı 347-sanlı qararına muwapıq:
Ministrler Kabineti janındaǵı Tashkent islam universitetin pitkerip, mámleketlik uyımlarǵa hám mámleketlik emes shólkemlerge jumısqa qabıl etiletuǵın bakalavr hám magistrlerdiń lawazımlıq miynet haqılarına 20 procent ústeme.