Búgingi kúnde ósip kiyatırǵan jas áwladtı hár tárepleme jetik, kámil insan etip tárbiyalawda olardıń sawatlılıǵın arttırıw menen birge, xalqımızdıń bay tariyxı hám mádeniy miyrasları menen tanıstırıw, ruwxıy jaqtan rawajlandırıw, dúnyaǵa kóz-qarasın keńeytiw de áhmiyetli bolıp esaplanadı.

Usı maqsette Nókis rayonındaǵı 17-sanlı ulıwma  orta  bilim  beriw mektep oqıwshılarınıń qısqı dem alısın mazmunlı ótkeriw maqsetinde I.V.Savickiy atındaǵı Qaraqalpaq mámleketlik kórkem óner muzeyine, Qaraqalpaqstan Respublikası tariyxı hám mádeniyatı mámleketlik muzeyine hám de Ámet Shamuratov hám Ayımxan Shamuratova atındaǵı úy muzeyine sayaxatı shólkemlestirildi.

Sayaxat dawamında oqıwshılar qaraqalpaq xalqınıń milliy qádiriyatları, úrp-ádet hám dástúrlerin ózinde jámlegen eksponatlardı tamashalap, qánigelerden muzey eksponatları haqqında keń túrde maǵlıwmatlar aldı.

Álbette, muzeyler hár bir xalıqtıń ótmishinen búgingi kúnine shekem saqlanıp kiyatırǵan shejiresi esaplanadı. Olar arqalı xalıqtıń tariyxın, dáwirdiń ruwxın seziwimiz múmkin. Jaslardı ana Watanǵa sadıqlıq, milliy qádiriyatlarımızǵa, úrp-ádet hám dástúrlerimizge húrmet ruwxında tárbiyalawdaǵı ornı sheksiz bolıp esaplanadı.

Sonday-aq, oqıwshılar Jańa jıl arshasına, shayır babamız Ajiniyaz Qosıbay ulı háykeline de bardı.

Oqıwshılardıń dem alıs waqtı mazmunlı ótti hám sayaxat oqıwshılarda úlken tásir qaldırdı.