Xabarıńız bar, Ózbekstan Respublikası Mektepke shekemgi hám mektep bilimlendiriwi ministrligi tárepinen usı jıldıń 7-iyun kúni "Marshall Cavendish Education" shólkemi menen birgelikte "Tabıslı reformalar - joqarı nátiyjeler" atamasında xalıqaralıq konferenciya shólkemlestirilgen edi.

Konferenciyanı ótkeriwden tiykarǵı maqset, Ózbekstanda ulıwma orta hám mektepten tısqarı bilimlendiriwdi sistemalı reformalaw, ósip kiyatırǵan jas áwladtı ruwxıy-ádep-ikramlılıq hám intellektuallıq rawajlandırıwdı sapa jaǵınan jańa basqıshqa kóteriw, keyingi jılları elimizdiń xalıqaralıq kólemde oqıwshılardı bahalaw baǵdarlamaları reytingi boyınsha dúnyanıń aldınǵı mámleketleri qatarına kiriwine erisiw, úzliksiz bilimlendiriw sistemasınıń mazmunın sapa jaǵınan jańalaw, oqıtıw metodikasın jetilistiriw, Ózbekstannıń xalıqaralıq bahalaw baǵdarlamalarındaǵı nátiyjeleri tiykarında ámelge asırılatuǵın reformalar hám usı baǵdardaǵı xalıqaralıq tájiriybelerdi úyreniw jáne milliy dárejede oqıtıw hám bilim alıw sharayatların jaqsılawdan ibarat.

Sonıń menen birge, ilaj dawamında Singapur tájiriybesi tiykarında mektep basshıları hám muǵallimleriniń mamanlıǵın arttırıw, olardıń kásiplik rawajlanıwına baylanıslı aldınǵı tájiriybelerdi almasıw, oqıwshılardıń bilim hám kónlikpelerin bahalaw hám rawajlandırıwda jasalma intellekt imkaniyatlarınan keńnen paydalanıw, bilimlendiriwdi sanlastırıw boyınsha taraw qánigeleriniń bar bilimlerin jáne de arttırıw názerde tutılǵan edi.
Konferenciyanıń logikalıq hám izbe-iz dawamı sıpatında usı jıldıń avgust ayınan baslap usı treninglerde qatnasqan 400 ge shamalas mektep direktorları (menejerler), matematika hám tábiyǵıy pánler muǵallimleri (master-trenerler) potencialınan paydalanǵan halda mámleketimiz boylap aymaqlar, rayon hám qalalar hám mektepler dárejesinde kaskad usılında treningler dawam ettiriliwi rejelestirilgen edi.
Usı baǵdarda búgin Qaraqalpaqstan Republikası Pedagoglardı jańa metodikalarǵa úyretiw milliy orayında seminar shólkemlestirildi.

Seminarǵa Ózbekstan Respublikası Mektepke shekemgi hám mektep bilimlendiriw ministriniń máslahatshısı Uliǵbek Tashkenbaev, A.Avloniy atındaǵı pedagoglardı kásiplik rawajlandırıw hám jańa metodikalarǵa úyretiw milliy-izertlew institutınıń bólim baslıǵı Qadirbay Bekturdiev, Qaraqalpaqstan Respublikası Mektepke shekemgi hám mektep bilimlendiriw ministriniń birinshi orınbasarı Aybek Dauletbaev, ministrliktiń qánigeleri, rayon(qala)lıq mektepke shekemgi hám mektep bilimlendiriw bólim baslıqları hám A.Avloniy atındaǵı pedagogikalıq sheberlik milliy institutı tárepinen tayarlanǵan reje baǵdarlaması tiykarında usı jıldıń iyul ayında Tashkent qalasında ótkerilgen treninglerde qatnasqan 5 koordinator, 17 trener qatnastı.

- bilimlendiriwde názerde tutılǵan reformalardı ámelge asırıwda mektep basshılıǵınıń ornı,

- ustazlardıń kásiplik rawajlanıwın qollap-quwatlaw,

- reformalardıń mazmunın mektep jámáátine jetkeriw, bilimlendiriwde menedjmentti rawajlandırıw,

- bilimlendiriw mákemesindegi ortalıqtı jaqsılaw haqqında sóz boldı.
Sonday-aq, isleniwi kerek bolǵan wazıypalar belgilenip alındı.