Sociallıq tarmaqlar arqalı Shımbay rayonı mektepke shekemgi hám mektep bilimlendiriw bólimine qaraslı 29-sanlı mektepke shekemgi bilimlendiriw shólkeminiń qurılıs ońlaw jumıslarına pul jıynaw jaǵdayları boyınsha post tarqaldı. 

Tarqalǵan post boyınsha Qaraqalpaqstan Respublikası Mektepke shekemgi hám mektep bilimlendiriw ministrligi tárepinen úyreniw jumısları alıp barıldı. 

Úyreniw dawamında Shımbay rayonı  «Taǵjap» APJ aymaǵındaǵı 29-sanlı mektepke shekemgi bilimlendiriw shólkemi 1990-jılı qurılǵan, 90 orınǵa mólsherlengen bolıp, búgingi kúnde qurılıs ońlaw talap dárejesine kelip qalǵan. Bul shólkem jumısın waqtınsha toqtatıp turıw boyınsha bir qansha usınıslar beriliwine qaramastan sol aymaqtaǵı ata-analardıń ótinishine qaray ele jumıs alıp barmaqta.  

Sonlıqtan shólkemde kishi ońlaw jumısları alıp barılǵan. Sırtqı hájetxanasına talap dárejesinde emesligi sebepli ata-analar ózleri oylasılǵan halda perzentleri ushın qayırqomlıq etiw maqsetinde pul jıynap, jańadan hájetxana alıp beriwdi maqset etken. Ata-analar baqlaw keńesiniń bayanlamasına tiykar, ıxtıyarıy túrde qáwenderlik etip kóship júriwshi, waqtınsha hájetxana isletip berilgen.  

Demek bul jerde shólkem hájetxanası ushın ata-analardan májbúriy pul jıynaw boyınsha hesh qanday tapsırma berilmegenligi anıqlandı. 

Qaraqalpaqstan Respublikası Mektepke shekemgi hám mektep bilimlendiriw ministrligi tárepinen 2025-jılı ushın Shımbay rayonı  «Taǵjap» APJ aymaǵındaǵı 29-sanlı mektepke shekemgi bilimlendiriw shólkemi qurılıs ońlaw jumısları alıp barılıw ushın mámleketlik baǵdarlamalarǵa usınıs beriliwi rejelestirlgenligin málim etip bildiremiz. 

Ministrliktiń Málimleme xızmeti