Búgingi kúnde elimizde 130 dan aslam millet wákilleri bir-birine húrmet hám bekkem awız birshilik penen turmıs keshirip, elimizdiń barlıq tarawlarında teńdey huqıqlarda, hár qıylı tarawlarda jemisli miynet etip, Watanımızdıń gúllep-jasnawına hám onıń ǵárezsizligin bekkemlewge, Respublikamızdıń xalıqaralıq maydandaǵı abıroyın arttırıwda múnásip úleslerin qosıp kelmekte.

Mámleketimizde 2021-jıl 10-fevralda 30-iyul sánesin "Xalıqlar doslıǵı kúni" sıpatında keń túrde belgilew haqqında 672-sanlı Ózbekstan Respublikasınıń Nızamı qabıl etildi. Bul bolsa kóp milletli elimizde milletler ara tatıwlıqtıń joqarı basqıshqa shıǵıwına negiz jarattı.

Sáne múnásibeti menen orınlarda "Milletlerara tatıwlıq" atamasında "Doslıq festivalı" ilajları shólkemlestirilmekte. Usınday ilajlardıń biri Qońırat rayonı 5-sanlı hámde 25-sanlı mektepke shekemgi bilimlendiriw shólkemlerinde kóterińki ruwxta ótkerildi.

"Doslıq festivalı" ilajları dawamında shólkemlerdiń tárbiyalanıwshıları tárepinen elimizde jasawshı xalıqlardıń mádeniyatın ózinde sáwlelendirgen milliy kiyimler kórgizbeleri menen koncert tamashaları jıynalǵanlarǵa bir álem zawıq baǵıshladı.

Ótkerilgen ilájlarǵa rayon hákimi orınbasarı, shańaraq hám hayal-qızlar bólimi baslıǵı J.Ametova hámde rayonlıq IIB inspektorı J.Uteniyazovalar qatnasıp, shólkem xızmetkerleri arasında "Milletler ara tatıwlıq" boyınsha úgit-násiyat, túsinik jumısların alıp bardı.