Ózbekstan Sawda-sanaat Palatasında Qaraqalpaqstan Respublikası basqarmasında Prezidentimizdiń isbilermenler menen Ashıq-aydın pikirlesiw ilajına tayarlıq kóriw sheńberinde jeke menshik bilimlendiriw shólkemlerinde (mektepke shekemgi bilimlendiriw, mektep, orta-arnawlı hám joqarı bilimlendiriw tarawında) jumıs alıp barıwshı isbilermenler qatnasında ashıq sáwbet shólkemlestirildi.
 

Ilajdı shólkemlestiriwden tiykarǵı maqset – Prezidentimizdiń isbilermenler menen ushırasıwı aldınan isbilermenlikti bunnan bılay da rawajlandırıw baǵdarında pikir hám usınısların úyrenip shıǵıwdan ibarat.
 

Ashıq sáwbette Qaraqalpaqstan Respublikası Mektepke shekemgi hám mektep bilimlendiriw ministri G.Xojabaeva, Sawda-sanaat Palatasınıń Qaraqalpaqstan Respublikası basqarması baslıǵınıń birinshi orınbasarı A.Seytaxov, sonday-aq, QR Densawlıqtı saqlaw ministrligi, Biznes ombudsman wákilleri hám isbilermenler qatnastı.

Ushırasıwda isbilermenler tárepinen licenziya alıw jumısların ápiwayılastırıw, jeke bilimlendiriw mekteplerine shet elli oqıtıwshılardı alıp keliw boyınsha jeńillikler engiziw, jeke biznes mekteplerin jaratıw hám shet elli jerleslerimizdiń balaların oqıtıw baǵdarında onlayn bilimlendiriwdi jolǵa qoyıw zárúr ekenligi boyınsha bir qansha usınıslar bildirildi.