Qaraqalpaqstan Respublikası Mektepke shekemgi hám mektep bilimlendiriw ministr Gúlistan Kojabaeva basshılıǵında zoom baǵdarlaması arqalı rayon(qala)lıq mektepke shekemgi hám mektep bilimlendiriw bólim baslıqları qatnasıwında ashıq sáwbet ótkerildi.

Ashıq sáwbette ministr G.Kojabaeva sózge shıǵıp, pedagog kadrlar taraw basshılarınıń jumıslarına narazılıqları, sociallıq tarmaqlarda bilimlendiriw sistemasındaǵı alıp barılıp atırǵan jumıslar boyınsha sın kóz-qarastaǵı materiallar hám múrájatlar óz waqtında taraw qánigeleri tárepinen úyrenilip hám úyreniw nátiyjesi menen ministrliktiń rásmiy veb-saytı, sociallıq tarmaqlar arqalı ashıq, aydın maǵlıwmatlar berilip atırǵanı haqqında aytıp ótti.
 

Sonıń menen bir qatarda ashıqlıq hám áshkaralıqtı támiyinelew maqsetinde ministrliktıń veb-saytı (https://kk.uzedu.uz/) arqalı «Ashıq maǵlıwmatlar» dúzilgen bolıp, hár úsh aydan maǵlıwmatlar jaylastırılıp kelinbekte.

Sonday-aq, 2024-jıldıń 6 ay dawamında sociallıq tarmaqlar arqalı 25 sın materiallar tarqalǵan. Usı tarqalǵan materiallardıń basım kópshiligi Tórtkúl rayonına tuwra kelmekte. Búgingi kúnge kelip bul sın materiallar ministrliktiń arnawlı isshi topar xızmetkerleri tárepinen úyrenilip shıǵılıp,  Málimleme xızmeti tárepinen rásmiy sayt hám tarmaqlar arqalı  25 rásmiy múnásibet berildi.
 

Ilaj sońında ǵalaba xabar quralları hám sociallıq tarmaqları arqalı járiyalanıp atırǵan sın  materiallarǵa tezlik penen, belgilengen reglament boyısha óz waqtında juwap beriw hám isleniwi kerek bolǵan wazıypalar belgilenip alındı.

Ministrliktiń Málimleme xızmeti