Nókis qalası Mektepke shekemgi hám mektep bilimlendiriw bólimine qaraslı  22-sanlı ayırım pánler tereńlestirip oqıtılatuǵın klası bar ulıwma bilim beriw mektebinde matematika páninen shólkemlestirilgen pán dógerekleri aǵzaları, Qaraqalpaqstan Respublikası bilimlendiriw orayı, mektep matematika páni muǵallimleri qatnasında “Xalıqaralıq π sanı kúni”ne arnap Respublikalıq kólemde seminar hám Zakovat intellektual oyını shólkemlestirildi. Bul seminarda Qaraqalpaqstan Respublikası bilimlendiriw orayı anıq pánler metodisti Z.Jánibekova, rayon hám qalalardan matematika muǵallimler miymanda boldı. Z.Janibekova sózge shıqtı hám ol óz sózinde seminardı ashıq dep jariyaladı hám seminar basqıshların aytıp ótti.
 

Kelgen miyman muǵallimler eki toparǵa bólindi hám “Xalıqaralıq π sanı kúni”ne arnalǵan dógerek jumıslarına kirdi hám bul jumıslardı talqıladı. Dógerek basshısı D.Dauimov 8-klass oqıwshlarına “Sheńberdiń uzınlıǵı hám dóńgelektiń maydanı” temasında dógerek sabaǵın ótti.

Kelgen miymanlar muǵallimler hám mektebimizdiń “Zakovat” dógeregi aǵzaları qatnasında Zakovat intellektual oyını shólkemlestirildi. Bunda jeńimpaz komanda sawǵalar menen sıylıqlandı. Soń muǵallimler bir-biri menen pikir almasıp, sáwbetlesiwi maqsetinde “Kofe break” shólkemlestirildi.

Seminar aqırında “Matematika” dógeregi basshısı Z.Otambetova tárepinen hám barlıq dógerek aǵzaları qatnasıwında koncert dástúri shólkemlestirildi.  

Dástúr dawamında tamashagóyler menen birgelikte matematikalıq soraw juwaplar ótkerildi, dógerek aǵzaları tárepinen π sanınıń kelip shıǵıwı kórsetip berildi, “Xalıqaralıq π sanı kúni”ne arnap “Diywal gazetaları” tańlawı ótkerildi hám sawǵalar menen sıylıqlandı.

Dógerek aǵzaları atqarıwında ayaq-oyınlar hám saxnalıq kórinisler shólkemlestirildi.

Seminar shólkemlestiriwshileri Z.Otambetova hám D.Dauimov Qaraqalpaqstan Respublikası Mektepke shekemgi hám mektep bilimlendiriw ministri tárepinen húrmet jarlıǵı menen sıylıqlandı.