Búgin Nókis qalası 2-sanlı Informatika hám xabar texnologiyaları pánin tereńlestirip oqıtıwǵa qánigelstirligen mámleketlik ulıwma orta bilim beriw mektebinde “VR-Profi Hub: Ózbekstandaǵı ulıwma orta bilim beriw mektep oqıwshıların kásipke baǵdarlawdıń innovaciyalıq usılı” atamasında seminar-trening shólkemlestirildi.
 

Seminar-treningge Ózbekstandaǵı Gyote-Instituti direktor orınbasarı Valter Zabiel, usı instituttıń málimleme hám kitapxana bóliminiń baslıǵı Gavxar Zakirova, málimleme hám kitapxana bóliminiń eksperti Dilaram Ismatullaeva, VRonicka kompaniyasınıń texnik direktorı Shabkat Kahharov, kompaniyanıń qánigesi Islam Sharipov, TBC banktıń baǵdarlamashısı Andrey Melnik, IT-Investment Centeriniń jas qánigesi Gulnoza Abdurashidova, Qaraqalpaqstan Respublikası Mektepke shekemgi hám mektep bilimlendiriw ministrliginiń bólim baslıǵı Zamira Seytjanova hám oqıwshı jaslar qatnastı.
 

Ulıwma orta bilim beriw mekteplerinde oqıwshılardı kásipke baǵdarlaw ushın qollap-quwatlaw maqsetinde Ózbekstanǵı Gyote-Instituti Ózbekstan Respublikası Mektepke shekemgi hám mektep bilimlendiriw ministrligi menen birgelikte oqıwshı jaslardı kásipke baǵdarlaw boyınsha innovaciyalıq jantasıw bolǵan “VR-Profi Hub” joybarın ámelge asırmaqta.
 

Bul joybardan gózlengen maqset:

-oqıwshılarǵa IT-tarawdaǵı kásipler haqqında maǵlıwmat beriw;

-olardı IT-kásipler menen, sonday-aq, Germanıyadaǵı IT kárxanalardaǵı jumıs processleri menen VR kóz áynekleri arqalı jaqınnan tanıstırıw;

-oqıwshılarǵa IT-tarawı qánigeleri tárepinen ótkerilgen sheberlik sabaqlarında ózleriniń dáslepki baǵdarlamaların, dáslepke mobil qosımshaların jaratıwǵa kómek beriw;

-IT-tarawında jetiskenlik penen jumıs alıp barıp atırǵan jas qánigeler menen sáwbet shólkemlestiriw, sonıń menen birge joybar dawamında oqıwshı jaslarǵa kásip iyelewde shet tilliniń áhmiyetin túsintiriw hám olardı nemis tilin 2-shet tili sıpatında úyreniw, Germaniya mámleketinde oqıw hám jumıs islew ushın qızıǵıwshılıqların arttırıwdan ibarat.