Sociallıq tarmaqlar arqalı Nókis qalasında ótkerilgen "Hákim  olimpiadası"nda dúzilgen testlerde qátelikke jol qoyılǵanlıǵı boyınsha post járiyalanǵan.

Járiyalanǵan post boyınsha Qaraqalpaqstan Respublikası Mektepke shekemgi hám mektep bilimlendiriw ministrliginen

Rásmiy múnásibet

Nókis qalasında ótkerilgen "Hákim olimpiadası"na dúzilgen testlerdiń qátelikleri Qaraqalpaqstan Respublikası Mektepke shekemgi hám mektep bilimlendiriw ministrligi tárepinen úyrenilip shıǵıldı.

Úyreniw nátiyjesinde  Nókis qalası hákimi A. Daniyarovtıń  baslaması menen ótkerilip atırǵan  "Hákim  kubogi"  tańlawında  inglis  tilinen  test sorawlarınıń ózbek tilinde tayarlanǵanlıǵı, 7-klass ushın inglis  tilinen tayarlanǵan 30 test   mazmunı úyrenilgende  barlıq test sorawları  durıs juwapları menen tayarlanǵanlıǵı, test sorawlarınıń quramında  nadurıs juwap bolmaǵan yamasa qáte dúzilgen test variantları  joq ekenligi anıqlandı.

Demek, inglis tilinen óz bilimin  sınap kóriwge kelgen oqıwshı ushın hesh qanday tosqınlıq bolmaǵan. Test dúziw barısında test sorawlarınan 6,11, 20,26- sorawlardaǵı tapsırmalar  haqıyqatında da  ózbek tilinde berilgen, biraq bul da oqıwshınıń test sınawında tómen ball alıwına  tiykar  bola almaydı,  sebebi ulıwma orta bilim beriw mekteplerinde 1-11-klass oqıwshılarınıń shet tillerin úyreniwi barısında  qaraqalpaq, rus hám ózbek tilleri birdey alıp barıladı, sol ushın oqıwshıǵa  túsinikli hám oqıwshı inglis tilindegi sózlerdi bul tillerde qıyınshılıqlarsız túsine aladı.

Tayarlanǵan test sorawlarındaǵı jol qoyılǵan qáte-kemshilikler boyınsha  2024-jıl 22-aprel sánesinde Respublikalıq bilimlendiriw orayı direktorı janındaǵı  óndirislik májilisinde  kórip shıǵılıp, 2024-jıl  21-aprelde ótkerilgen  “Hákim olimpiadası”na  test sorawların tayarlawda  itibarsızlıǵı ushın Respublikalıq bilimlendiriw orayı metodisti T.Z oray direktorı tárepinen tiyisli tártipte intizamiy jaza sharası kórildi. Sonday-aq, metodist T.Z aldaǵı waqıtları xızmet wazıypasın atqarıwda juwapkershilik penen qaraw boyınsha eskertilgenligin  málim etip bildiremiz.

QR Mektepke shekemgi hám mektep bilimlendiriw ministrligi Málimleme xızmeti