Búgin Qaraqalpaqstan Respublikası Mektepke shekemgi hám mektep bilimlendiriw ministrliginiń májilisler zalında «Korrupciya-jámiyet dushpanı» atmasında keńeytirilgen májilis bolıp ótti.

Májiliske Qaraqalpaqstan Respublikası Mektepke shekemgi hám mektep bilimlendiriw ministri Gúlistan Kojabaeva, ministrliktiń Korrupciyaģa qarsı gúresiw hám ishki qadaģalawdı ámelge asırıw bóliminiń bas qánigesi Shaxzada Babanazarova, Nókis qalası Mektepke shekemgi hám mektep bilimlendiriw bólimi hám barlıq mektepke shekemgi bilimlendiriw shólkem direktorları qatnastı.

Ilajda ministr Gúlistan Kojabaeva sózge shıǵıp, korrupciya bul – jámiyettiń rawajlanıwna kesent etetuǵın unamsız illet ekenligi haqqında aytıp ótti. Tilekke qarsı bunday unamsız illettiń búgingi kúnde ushırasıp atırǵanlıǵı hám mektepke shekemgi bilimlendiriw shólkem jumıslarında anıqlanǵan qáte-kemshliklerge toqtaldı.

Sonday-aq, Ózbekstan Respublikası Ministrler Kabinetiniń 2019-jıl 25-iyun kúngi «Mámleketlik mektepke shekemgi bilimlendiriw shólkemlerinde salamat awqatlandırıw sistemasın jáne de jetilistiriw haqqında»ǵı 626-sanlı qararda kórsetilgen talaplardıń tolıq orınlanbaǵanlıǵı, belgilep berilgen wazıypalar talap dárejesinde emesligi sınǵa alındı. 

Sonıń menen birge ministrlik tárepten mektepke shekemgi bilimlendiriw shólkemlerinde úyreniwler alıp barıldı. Ayırım mektepke shekemgi bilimlendiriw shólkem direktorları menen korrupciyalıq jaǵdaylardıń ushırasıwı, balalarǵa beriletuǵın azıq-awqat ónimlerin isbilermen tárepten qabıl etip alınǵanda qáte-kemshiliklerge jol qoyǵanlıǵı, ónimlerdiń SanPin normasınan zıyat, yamasa kem berilip atırǵanlıǵı unamsız jaǵdaylar anıqlanǵanlıǵı aytıp ótildi.

Alıp barılıp atırǵan monitoring jumıslarınıń nátiyjesinde shólkemlerde anıqlanǵan unamsız háreketler boyınsha nızam sheńberinde tiyisli sharalar kóriletuǵınlıǵı eskertildi. Anıqlanǵan kemshiliklerdi saplastırıw boyınsha tapsırmalar berildi.

QR Mektepke shekemgi hám mektep bilimlendiriw ministrliginiń Málimleme xızmeti