Ájiniyaz atındaǵı Nókis mámleketlik pedagogikalıq institutında ulıwma orta bilim beriw mektepleriniń pitkeriwshi klass oqıwshıları arasında ximiya, biologiya hám fizika boyınsha pánler olimpiadasınıń institut basqıshı bolıp ótti.

Ilajda instituttıń ilimiy isler hám innovaciyalar boyınsha prorektorı R.Eshmuratov, tiyisli fakultetlerdiń dekanları, kafedra baslıqları sózge shıǵıp, pánler olimpiadasın ótkeriwdiń áhmiyeti, búgingi kúnde elimizde jaslardıń joqarı maǵlıwmatlı bolıp, kásip-óner úyreniwi ushın jaratılǵan sharayatlar haqqında aytıp ótti hám qatnasıwshılarǵa tabıslar tiledi. 

Pánler olimpiadasında qatnasıwshılar jazba, test hám laboratoriyalıq jumıslar arqalı óz bilim hám kónlikpelerin sınaqtan ótkerdi. 

Pánler olimpiadası Ózbekstan Respublikası Prezidentiniń «Ximiya hám biologiya baǵdarlarında úzliksiz bilimlendiriwdiń sapasın hám ilimniń nátiyjeliligin arttırıw ilajları haqqında»ǵı, sonday-aq, «Fizika tarawındaǵı bilimlendiriw sapasın arttırıw hám ilimiy-izertlewlerdi rawajlandırıw ilajları haqqında»ǵı qararları, Joqarı bilimlendiriw, ilim hám innovaciyalar ministrliginiń tiyisli buyrıǵı, sonday-aq, Ájiniyaz atındaǵı Nókis mámleketlik pedagogikalıq institutı hám Qaraqalpaqstan Respublikası Mektepke shekemgi hám mektep bilimlendiriwi ministrligi arasındaǵı qospa qararǵa muwapıq shólkemlestirildi. 

Oqıwshılardıń jazba, test hám laboratoriyalıq jumısları tóreshiler quramı aǵzaları tárepinen ádil túrde bahalandı. 

Solay etip, pánler olimpiadasınıń institut basqıshında fizika páninen: 

1-orındı – Nókis rayonındaǵı 1-sanlı ulıwma bilim beriw mektebiniń oqıwshısı Janat Súndetbaeva;

2-orındı – Ámiwdárya rayonındaǵı 40-sanlı ulıwma bilim beriw mektebiniń oqıwshısı Sevinch Jabbarbergenova;

3-orındı – Kegeyli rayonındaǵı 55-sanlı ulıwma bilim beriw mektebiniń oqıwshısı Gáwhar Sarshaeva; 

Ximiya, biologiya páninen: 

1-orındı – Nókis qalasındaǵı 43-sanlı ulıwma bilim beriw mektebiniń oqıwshısı Sevinch Tursınova;

2-orındı – Nókis rayonındaǵı 31-sanlı ulıwma bilim beriw mektebiniń oqıwshısı Dilyafruz Qarlıbaeva;

3-orındı – Kegeyli rayonındaǵı 55-sanlı ulıwma bilim beriw mektebiniń oqıwshısı Shaxnoza Sharafatdinovalar iyeledi hám dárejeli diplomlar menen sıylıqlandı. 

Maǵlıwmat ornında atap átiw kerek, pánler olimpiadası juwmaqları boyınsha tiyisli balldı toplap, jeńimpaz bolǵan oqıwshılardı institutqa oqıwǵa qabıllaw boyınsha Mámleketlik komissiyasına usınıs beriledi.