2024-jıl 23-aprel kúni t.me/eltuz telegram kanalı arqalı Tórtkúl rayonı 68-sanlı ulıwma orta bilim beriw mektebi boyınsha post járiyalanģan.

Járiyalanģan post boyınsha Qaraqalpaqstan Respublikası Mektepke shekemgi hám mektep bilimlendiriw ministrliginen  

RADDIYA

Qaraqalpaqstan Respublikası Mektepke shekemgi hám mektep bilimlendiriw ministrligi t.me/eltuz telegram kanalı arqalı Tórtkúl rayonı 68-sanlı ulıwma orta bilim beriw mektebi tuwralı járiyalanıp atırģan materiallar haqqıyqatqa tuwra kelmeytuģın jalģan maģlıwmat ekenin málim etemiz.

Birinshiden, siz 2024-jıl 5-aprel kúni «Mektepke shekemgi hám mektep bilimlendiriw ministri Hilola Umarovaga múrájat» atamasında post járiyalanǵan. Onda Tórtkúl rayonı 68-sanlı mektep direktorı Qaraqalpaqstan Respublikası Joqarģı Keńesi baslıģınıń shákirti hám Qaraqalpaqstan Respublikası Mektepke shekemgi hám mektep bilimlendiriw ministriniń jaqın aģayını dep kórsetkensiz. Sol kúnniń ózinde ministrliktiń rásmiy veb-saytı hám sociallıq tarmaqları arqalı  Raddiya (https://t.me/kkeduuz/27638) berildi. Onda mektep direktorı Joqarģı Keńes baslıģınıń ustazı, ministrdiń jaqın aģayını emesligi, haqqıyqatqa tuwra kelmeytuģın tiykarsız maģlıwmat ekenligi jazıldı.  

Ekinshiden, siz 9-aprel kúni «Tórtkúl oqıtıwshıları dámegóy» atamasında post járiyalanǵan. Járiyalanģan post tolıģı menen ministrlik tárepinen úyrenip shıģıldı hám jalģan maģlıwmatlar berilgenligi anıqlandı.

Úshinshiden, siz 23-aprel kúni «Tórtkúl mekteplerinde korrupciya qashan tawsıladı?» atamasında post járiyalanǵan.
Bul jaģday boyınsha ministrlik tárepinen úyreniw jumısları alıp barılıp, tiykarsız maģlıwmatlar ekenligi anıqlandı.

Sonday-aq, t.me/eltuz telegram kanalına Tórtkúl rayonı 68-sanlı mektep tuwralı haqıyqatqa tuwra kelmeytuģın jalģan maģlıwmat berip turģan puqaranıń atı, familayası, jasaw mánzili kórsetilse maqsetke muwapıq boladı. Anıq maģlıwmatları kórsetilip jazılsa, ministrlik tárepinen arnawlı isshi topar dúzilip mánzilli úyreniw jumısları jolģa qoyıladı.

Sonıń menen bir qatarda siz tárepten shıģarılģan materiallar anonim múrájatlar esaplanadı. Bunda Nızam talaplarına muwapıq anonim múrájat úyrenip hám kórip shıģılmaslıģı belgilengen. 

Esletip ótemiz, jalǵan maǵlıwmattı tarqatıw Nızam sheńberinde juwapkershilikke tartıwǵa sebep boladı.

Qaraqalpaqstan Respublikası Mektepke shekemgi hám mektep bilimlendiriw ministrliginiń Málimleme xızmeti