Qaraqalpaqstan Respublikası Mektepke shekemgi hám mektep bilimlendiriw ministrliginiń is-rejesine tiykar, bilimlendiriw mákemleriniń iskerligin úyreniw boyınsha isshi topar shólkemlestirildi. Búgingi kúnge shekem tańlaw tiykarında úyrenilgen bilimlendiriw mákemelerinde anıqlanģan qáte-kemshilikler hám óziniń xızmet wazıypaların tiyisli tártipte orınlamaģanlıģi hám nızam talaplarına ámel etpegenligi ushın Nókis qalası 52-sanlı,  6-sanlı mektepke shekemgi bilimlendiriw shólkemi direktorları, xojalıq isleri boyınsha mengeriwshisi hám miyirbiykelerine, 54-sanlı mektepke shekemgi bilimlendiriw shólkeminiń xojalıq isleri boyınsha mengeriwshisi hám miyirbiykesine, 29-sanlı mektepke shekemgi hám mektep bilimlendiriw shólkeminiń 12 tárbiyashısına óz jumısına nemquraylıq penen qaraģanlıģı ushın Ózbekstan Respublikası Miynet kodeksine muwapıq intizamiy jaza sharaları qollanıldı.

Sonday-aq, búgingi kúnde Qaraqalpaqstan Respublikası Mektepke shekemgi hám mektep bilimlendiriw ministrligi tárepinen Nókis qalası 29-sanlı mektepke shekemgi  bilimlendiriw shólkemi direktorınıń óz lawazımına ılayıqlıģı qayta kórip shıģılmaqta.

Sonıń menen bir qatarda Shımbay rayonı 2, 16, 20-sanlı, Xojeli rayonı 21-sanlı, Ámiwdáriya rayonı 13-sanlı mektepke shekemgi bilimlendiriw shólkem direktorları menen dúzilgen miynet shártnamaları tiyisli tártipte bıykar etilgenligin  málim etip bildiremiz.

Házirgi waqıtta Qaraqalpaqstan Respublikası Mektepke shekemgi hám mektep bilimlendiriw ministrligi tárepinen respublikamızdaģı barlıq bilimlendiriw mákemelerinde úyreniw jumısları dawam etpekte.

QR Mektepke shekemgi hám mektep bilimlendiriw ministrligi Málimleme xızmeti