Búgin Nókis qalası Jaslar texnoparkinde Qaraqalpaqstan Respublikası Mektepke  shekemgi hám mektep bilimlendiriw ministrligi tárepinen «Oqıwshılardı kásipke úyretiwde isbilermenler menen islesiw dáwir talabı» atamasında ámeliy seminar shólkemlestirildi.
 

Seminarģa Qaraqalpaqstan Respublikası Mektepke shekemgi hám mektep bilimlendiriw ministri G.Kojabaeva, ministr orınbasarı M.Shlimbetova, Qaraqalpaqstan Respublikası IT park filialı bas menejeri I.Ismaylov, Ónermetler bóliminiń baslıģı D.Allambergenova, Jaslar texnoparkinıń oqıw bóliminiń menejeri Q.Yoldashov, Ózbekstan Sawda sanaat palatası Qaraqalpaqstan Respublikası basqarması bizneske oqıtıw bólim baslıģı M.Ikmetov, ministrliktiń juwaplı xızmetkerleri hám respublikamızdan jámi 62 ulıwma orta bilim beriw mektepleriniń direktorları qatnastı.
 

Ilajda shólkemlestiriwshiler tárepinen AQSh, Yaponiya, Angliya mámleketlerinde mekteptegi tálim-tárbiya processi boyınsha túsinik berildi. Sonday-aq, jaqında Qaraqalpaqstan hám Ferģana tájriybesi boyınsha ótkerilgen ámeliy ilajda qatnasıwshılar alģan bilim hám kónlikpelerin bólisti. Ferģana wálayatında oqıwshılardı kásip-ónerge baģdarlaw boyınsha alıp barılıp atırģan jumıslar menen  keńnen sáwbetlesip óz-ara pikirler almasıldı.

Sonıń menen bir qatarda seminar qatnasıwshıları  Nókis qalası 2-sanlı ulıwma orta bilim beriw mektebinde oqıwshılar ushın kásip-óner úyreniw baģdarında jaratılģan imkaniyatların barıp kórdi. Usı mektepte ustashılıq, tigiwshilik xanalarında oqıwshılar tárepinen islep shıģılģan qol miynetleri menen de jaqınnan tanıstı.
 

Oqıwshılarģa kásip-óner sırların úyreniwde durıs jol joba berilse, olar keleshekte óz ornına iye maman qánige bolıp jetilisip shıģadı. Usınday bir maqset jolında jıynalģan pedagoglar isleniwi tiyis bolģan wazıypalardı anıq belgilep aldı.