ҚӘДИРЛИ ЎАТАНЛАСЛАР, ҲҮРМЕТЛИ УСТАЗЛАР ҲӘМ КӘСИПЛЕСЛЕР!

Қарақалпақстан Республикасы Халық билимлендириў министрлиги жәмәәти атынан бәршеңизди өзгеше қуўаныш ҳәм үмит бағышлап, үлкен дөретиўшилик ислерге руўхландырып атырған Жаңа жыл байрамы менен қызғын қутлықлайман.

Өзиниң умытылмас мәўритлери менен ажыралып туратуғын 2022-жылға нәзер таслар екенбиз, турмысымыздың барлық тараўларында, әсиресе, билимлендириў тараўында да өзгерислерге, жаңаланыўларға бай жыл болды, деўге толық тийкарлар бар.

Әсиресе, елимизде жасларға итибарды күшейтириў, жас әўладты мәденият, көркем-өнер, физикалық тәрбия ҳәм спортқа тартыў, оларда мәлимлеме технологияларынан нәтийжели пайдаланыў көнликпесин қәлиплестириў, жаслар арасында китапқумарлықты кең ен жайдырыў, ҳаял-қызлар бәнтлигин тәмийинлеў мақсетинде Республикамыздың бәрше аймақларында, қысқа ўақыт ишинде көлемли жумыслар әмелге асырылды.

Сондай-ақ, ҳәзирги күнде республикамыздағы бәрше мектеплерде өткерилип атырған ҳәр қыйлы таңлаўларлар ҳәм де пән олимпиадаларында  тәлим-тәрбия алып атырған жасларымыз ушын кең имканиятлар жаратылды. Соның менен бирге, мектеп оқыўшы-жаслары арасында “Сап денеде сап ақыл” дегендей ҳәр қыйлы спорт жарыслары да, турнирлер де жолға қойылып, перзентлеримиздиң кәмил инсан болып жетилисиўинде үлкен хызмет атқармақта.

Солай екен, басланажақ 2023-жылы да елимиз тарийхында, әсиресе, билимлендириӯ тараӯындағы пидайы хызметкерлерге көплеген жетискенликлер ҳәм жаңаланыӯларға толы жыл болсын!

Бәршеӊизди кирип киятырған Жаӊа жыл байрамыңыз бенен және бир мәрте шын жүректен қутлықлап, бәршеңизге саў-саламатлық, бахыт-ығбал, жуўапкершиликли ҳәм мәртебели жумысларыңызда табыслар, шаңарақларыңызға қут-берекет тилеймен.

Ҳүрмет пенен,

Қарақалпақстан Республикасы Халық билимлендириў министри Ахмед Наримбетов