Qaraqalpaqtan  Respublikası Mektepke Shekemgi hám mektep bilimlendiriw ministrliginiń májilisler zalında «Kiber jınayatlar jábirleniwshilerine aylanıp qalmań» atamasında ushırasıw bolıp ótti.
 

Ushırasıwģa Qaraqalpaqstan Respublikası Mektepke shekemgi hám mektep bilimlendiriw ministriniń orınbasarı M.Shlimbetova, Qaraqalpaqtan  Respublikasi IIM Operativ izlew xizmeti Kiber qáwipsizlik qániygesi J.Kdirbayev hám ministrlik qánigeleri qatnastı.
 

Ilajda  J.Kdirbayev sózge shıǵıp házirgi kúnde kóp ushıraytuǵın jaǵdaylardıń biri-bul bank kartalarınan pul sheship alıw jınayatı júz berip atırǵanın atap ótti. Bank kartalarınan pullardı urlaw menen baylanıslı 6 túrli usıl bar. Bular telefon qońırawlarında tólew shólkemleri yamasa bank xizmetshisi retinde «SMS» kodtı alıw arqalı, sociallıq tarmaqlar yamasa «OLX» sawda platformasında satıwshı yamasa qarıydar bolıp aldaw jolı, rásmiy bolmaǵan dereklerden júklep alınǵan programmalardı telefonǵa ornatıw, mámleket tárepinen járdem pulı berilmekte yamasa arzanlastırılǵan bank kreditlerine uqasaǵan feyk saytlar, materiallıq járdem, onlayn kredit, utıslı oyın jeńimpazı sıyaqlı aldawlar menen jiberilgen jalǵan siltemeler hám jalǵan onlayn birja arqalı júz berip atırǵanın aytip ótti.
 

Usı atap ótilgen aldawshılardıń oljasına aylanbaw ushın telefonıńızǵa kelgen kodtı heshkimge bermewińiz hám de sociallıq tarmaqlar, elektron pochta mánzilleri arqalı jiberilgen gúmanlı siltemelerge kirmewińiz, jeke maǵlıwmatlarıńızdı ózgelerge usınıs etpewińiz hám social tarmaqlarǵa jaylastırmawıńız, internet tarmaqlarında keletin  hár qanday qarjılı xabarlarǵa isenbew, hár qıylı oyınlarǵa, programmalarǵa kirmewińiz kerekligi esletilip ótildi.

Ushırasıw qatnasıwshıları kiber jınayatlar boyinsha qızıqtırģan sorawlarına tiyisli qánigeden juwaplar aldı.