Қарақалпақстан Республикасы Мектепке шекемги ҳәм мектеп билимлендириў министрлиги, Жаслар ислери агентлиги Қарақалпақстан Республикасы басқармасы, Санлы технологиялар министрлиги Қарақалпақстан аймақлық секторы ҳәм Қарақалпақстан телерадиокомпаниясы менен биргеликте мектеп оқыӯшылары ушын жаңа теле-викторина ойыны таярланбақта.

Теле-викторина ойыны “Билимлилер бәйгиси” деп аталып, усы жыл февраль айынан басланыӯы нәзерде тутылған.  

Усы мақсетте Қарақалпақстан Республикасы Мектепке шекемги ҳәм мектеп билимлендириў министрлигиниң мәжлислер залында жаңа теле-викторина ойынының  бағдарламасы бойынша презентация болып өтти. Онда теле-викторина ойынының шәртлери, мақсети ҳәм ӯазыйпалары ҳаққында  жыйналғанларға кең түрде түсиниклер берилди ҳәм тийисли жуӯапкерлер менен биргеликте теле-викторина ойыны туӯралы өз-ара пикир ҳәм усыныслар додаланды.

Соң теле-викторина ойынында қатнасыӯ избе-излигин анықлаӯ мақсетинде шек таслаӯ мәресими өткерилди.

Шек таслаӯ жуӯмағы бойынша республикамыздағы барлық район, Нөкис қаласы ҳәм И.Юсупов атындағы дөретиӯшилик мектебинен бес билимли 8-9-класс оқыӯшыларынан қуралған жәми 18 топар төмендеги тәртипте теле-викторина ойынында беллесетуғын болды.

1-топар: Қараөзек, Кегейли, Қанлыкөл районы;

2-топар: Беруний, Хожели районы ҳәм И.Юсупов дөретиӯшилик мектеби;

3-топар: Бозатаӯ, Қоңырат, Төрткүл районы;

4-топар: Шымбай, Тақыятас, Елликқала районы;

5-топар: Мойнақ, Әмиӯдәрья, Нөкис районы;

6-топар: Тахтакөпир, Шоманай районы ҳәм Нөкис қаласы.

Беллесиӯ жуӯмағында жеңимпаз болған топар теле-викторина ойынының нәӯбеттеги басқышына жоллама алып, беллесиӯди даӯам еттиреди.