Qaraqalpaqstan Respublikası Mektepke shekemgi hám mektep bilimlendiriw ministr orınbasarı Muxabbat Shlımbetova Respublikalıq "Bárkamal áwlad" balalar mektebinde alıp barılıp atırǵan dógerek jumısları hám mekteptegi oqıwshılar ushın jaratılǵan sharayatlar menen tanıstı.

Daslep Ministr orınbasarı dógerek aǵzaları hám dógerek basshıları menen sáwbetlesti.

Dógerek aǵzaları menen sáwbetlesiwi dawamında Mámleketimiz basshısı tárepinen ámelge asırılıp atırǵan keń kólemli reformalar, atap aytqanda, keleshek áwladqa kórsetilip atırǵan ayrıqsha itibar hám ǵamxorlıq, jas dóretiwshilerdi qollap-quwatlaw boyınsha alıp barılıp atırǵan jumıslar tuwralı ayttı. Sonıń menen birge, "Bárkamal áwlad" balalar mektebi iskerligin elede arttırıw, oqıwshılardı dógereklerge qamtıp alıwda pikir hám usınıslar bildirdi.

Soń Ministr orınbasarı Respublikalıq “Bárkamal áwlad” balalar mektep direktorı menen pikir alısıp, islerdi jáne de sistemalı jolǵa qoyıw boyınsha kórsetpeler berdi hám bergen usınıslar tiykarında islerdi sistemalı shólkemlestiriw belgilep alındı.

Búgingi kúnde Qaraqalpaqstan Respublikası boyınsha jámi 18 “Bárkamal áwlad” balalar mektebi bolıp, sonnan 1 respublikalıq, 17 rayon(qala)lıq “Bárkamal áwlad” balalar mektebi jumıs alıp barmaqta. Bul mekteplerdegi 863 dógerekke 24966 oqıwshı qamtıp alınǵan. Olarǵa 898 pedagog xızmetkerler tálim-tárbiya hám kásip-óner sırların uyretip kelmekte.