Усы жыл 21-декабрь күни Республикалық Балалар китапханасында улыўма билим бериў мектеп китапханашылары арасында «Мектеп китапханаларында оқыўшы-жаслар менен ислесиў ҳәм китапқумарлықты раўажландырыў» атамасында оқыў-семинар болып өтти.

Семинарда Қарақалпақстан Республикасы Мектепке шекемги ҳәм мектеп билимлендириӯ министрлигиниң Мектептен тысқары билимлендириўди шөлкемлестиў секторы бас методисти Т.Байжанов қатнасты ҳәм кирис сөз бенен ашып берди. Сондай-ақ, Республикалық Балалар китапханасы директоры З.Сейтниязова, директор орынбасары З.Рамбергенова ҳәм басқада қәнигелер өз баянатлары менен қатнасты.

Оқыў семинарын өткериўдеги тийкарғы мақсет – мектеп китапханаларында жүргизилетуғын тийкарғы хүжжетлердиң жүргизилиў тәртиби ҳәм  оқыўшылардың китапқа болған қызығыўшылығын жаңа инновациялық усыллардан пайдаланған халда арттырыўдан ибарат.

Семинар соңында «Китап оқыўшылар арасында китапқумарлықты үгит-нәсиятлаў, китап оқыўға қызықтырыўдың жаңа усыллары» атамасында мастер класс өткерилди.

Семинар даӯамында мектеп китапханашылары менен өз-ара сәўбетлесиўлер ҳәм пикир алысыўлар болып өтти. Оқыў-семинарға республикамыздағы бәрше қала ҳәм районлардың улыўма орта билим бериў мектеп китапханашылары қатнасты. Солай етип өткерилген бул илажда қатнасыўшылар китапхана тараўындағы жаңа мағлыўматларға ийе болып,  өзлерин қызықтырған сораўларына жуўап алды.