Елимизде Өзбекстан Республикасы Конституциясының қабыл етилгенлигине 31 жыл толыӯы байрамы қарсағында, Төрткүл районы турғынларына үлкен қуўаныш ҳәм шадлықлар алып келмекте. Әсиресе, районда жүз берип атырған жаңалықларға жас шаңарақлар ҳәм онда тәрбия алып атырған балалардың қуўанышы өз алдына.

Атап айтатуғын болсақ, байрам алдында Төрткүл районында 15-санлы мектепке шекемги билимлендириӯ шөлкеминиң қосымша 90 ҳәм 3-санлы мектептиң 540 орынға мөлшерленген қосымша жаңа имараты пайдаланыӯға тапсырылды.

Райондағы 15-санлы мектепке шекемги билимлендириӯ шөлкеминиң қосымша имаратының ашылыў мәресиминде қатнасқанлар шығып сөйлеп, аймақ халқын байрам менен ҳәм қосымша имараттың ашылыўы менен қутлықлады. Бул мектепке шекемги билимлендириӯ шөлкеми 1993-жылы 140 орынға мөлшерленип қурылған болып, бүгинги күнде мәмлекетлик инвестиция дәстүри тийкарында 3 млрд 836 млн сӯм қаржы ажыратылып, қосымша 90 орынға мөлшерленген жаңа имараты пайдаланыӯға тапсырылды.

Соңынан имарат алдына тартылған дәстүрий лента кесилип, мектепке шекемги билимлендириў шөлкеми директорына символикалық гилт тапсырылды.

Илажда қатнасыўшылар жаңа бақшада балалар ҳәм хызметкерлер ушын жаратылған шараятлар менен танысып, оларға өзлериниң унамлы баҳаларын берди.

Соны айтып өтиӯ орынлы, соңғы жылларда билимлендириў тараўында жүргизилип атырған реформалар нәтийжесинде устазлардың жәмийетимизде тутқан орны ҳәм абырайы артып, билимлендириў мәкемелеринде тәлим-тәрбияның сапасы жақсыланбақта.

Әсиресе, келешегимиз болған жас әўлад ўәкиллерине жаратылып атырған қолайлы шараятлар нәтийжесинде, олар республикалық ҳәм халықаралық көлемде өткерилип киятырған пәнлер олимпиадасы, спорт жарыслары ҳәм таңлаўларда жақсы көрсеткишлерге ерисип, өз жақынларын қуўанышқа бөлемекте. Бул болса, бүгинги күнде елимизде билимлендириӯ тараӯына көрсетилип атырған айрықта итибардың нәтийжеси.

Төрткүл райондағы 3-санлы улыӯма билим бериӯ мектебине 6 млрд 696 млн сӯм қаржы ажыратылып, 540 орынлы қосымша жаңа имарат ҳәм 464 орынлы ески имаратта қайта қурылыс-оңлаӯ жумыслары алып барылды ҳам пайдаланыӯға тапсырылды. 

Илаж қатнасыўшылары мектепте жаратылған шараятлар менен жақыннан танысты.

Мағлыӯмат ушын: бүгинги күнде мектепте 850 оқыӯшы жасларға 60 педагог-оқытыӯшы тәлим-тәрбия берип келмекте.