Бүгин, 4-декабрь күни Нөкис қаласындағы Қарақалпақ мәмлекетлик жас тамашагөйлер театрында республикалық психологлар форумы өткерилди.

«Мектепке шекемги ҳәм мектеп билимлендириў системасындағы социаллық-психологиялық хызмет ҳәм кәсип-өнерге бағдарлаўда инновациялық қатнас» атамасында өткерилген илажда республикамыздың қала ҳәм районларындағы мектеплердиң әмелиятшы психологлары, инспектор-психологлары, жоқары оқыў орынларының оқытыўшылары қатнасты.

Форумда Қарақалпақстан Республикасы Мектепке шекемги ҳәм мектеп билимлендириӯ министриниң биринши орынбасары А.Даулетбаев қатнасты ҳәм шығып сөйледи.

Бул форумды өткериӯдеги мақсет – психологларды ҳәр тәреплеме қоллап-қуўатлаў, олардың жумысының әҳмийетин арттырыў, өз-ара тәжирийбе алмасыўына имканият жаратыў болып табылады.

Форумдаға қатнасқан мийманлар, психологлар, педагогларды жаңа методикаларға үйретиў миллий орайының қәнигелери ҳәм жоқары оқыў орынларының оқытыўшылары баянат жасады.

Соны айтып өтиӯ орынлы, 2021-жылдың 2-апрель күни Президентимиздиң қарары менен ҳәр бир мектепте инспектор-психолог лаўазымы енгизилген еди. Олар жас өспиримлер арасында ҳуқықбузарлықлар ҳәм жынаятшылықлардың алдын алыў бойынша мектеп жәмәәти ҳәм әмелиятшы психологлар менен жумыс алып барады. Форумда әмелиятшы ҳәм инспектор психологлардың алып барып атырған, сондай-ақ, алдағы ўақытлары әмелге асырыўы лазым болған жумыслары бойынша баянатлар тыңланды, пикир-усыныслар ортаға тасланды.

Илаж даўамында белсенди психологлар шөлкемлестириўшилер тәрепинен сыйлықланды. Соң қатнасыўшыларға концерт бағдарламасы қойып берилди.