Бирлескен Миллетлер Шөлкеми Ассамблеясының 1992-жыл 14-октябрьдеги 47/3-санлы резолюциясына муўапық ҳәр жылы 3-декабрь – Халықаралық майыплар күни сыпатында дүнья бойлап белгиленеди.

Оның мақсети – жәмийет турмысының барлық тараўларында майыплар ҳуқықларын қоллап-қуўатлаў, сондай-ақ, майыплардың машқалаларына кең жәмийетшиликтиң итибарын тартыўдан ибарат.

Усы мүнәсибет пенен Әжинияз атындағы Нөкис мәмлекетлик педагогикалық институтының Мектепке шекемги тәрбия ҳәм дефектология кафедрасы жәмәәти ҳәм студент жаслары пайтахтымыздағы 10-санлы "Нурлы мәкан" мектеп-интернатында болды.

Мийманлар елимизде имканияты шекленген инсанлар ҳәр тәреплеме қоллап-қуўатланып, олардың бахытлы турмыста жасаўы ушын барлық мүмкиншиликлер жаратылғанлығы ҳаққында кең түрде атап өтти ҳәмде балаларға байрам саӯғаларын тапсырды.

Илаж даӯамында мектеп-интернатының жас ҳәўескерлер дөгереги ағзалары тәрепинен таярланған концерт бағдарламасы ҳәм сахналық көринислери жыйналғанлар нәзерине усынылды.