Insan balası aradan jıllar ótken sayın óziniń biyǵam balalıq shaǵın, mekteptegi oqıwshılıq dáwirin erksiz saǵınadı. Qaytıp kelmes bul baxıtlı jıllar óziniń tákirarlanbas waqıyaları menen yadımızda máńgi mórlenip qaladı.

Ásirese, ózlerimizge dáslepki ret hárip tanıtıp, jazıw-sızıwdı úyretken birinshi muǵallimimizdi, sol jıllarda ótken álipbe hám jańa jıl bayramların hasla umıtpaymız. Házir respublikamızdaǵı ulıwma orta bilim beriw mekteplerinde 1-klass oqıwshılarınıń álipbe menen xoshlasıw kesheleri bolıp ótpekte. Oǵan óz muǵallimleri hám ata-anaları járdeminde áziz balalarımız puqta tayarlıqlar kórip, ózleriniń yadlaǵan qosıq hám taqmaqların mektep jámáátine aytıp bermekte.

1-klass oqıwshılarınıń «Xosh súyikli Álipbem» atamasındaǵı  álipbe menen xoshlasıw keshesi Shımbay rayonlıq Xalıq bilimlendiriw bólimine qaraslı 17- sanlı ulıwma orta bilim beriw mektebinde de shólkemleskenlik penen kóterińki ruwxta bolıp ótti.

Ilaj barısında oqıwshılar tárepinen tayarlap kelgen qosıqlar, taqmaqlar hám ayaq oyınlar atqarıldı.

Bayram sońında mektep direktorı, ustazlar hám ata-analar shıǵıp sóylep, elimizdiń erteńgi keleshegi bolǵan usınday ájayıp jas áwladtı tárbiyalap kiyatırǵan muǵallimlerge ózleriniń minnetdarshılıqların bildirdi.