Соңғы жыллары мәмлекетимизде барлық тараўлар сыяқлы билимлендириў тараўына да үлкен итибар қаратылған. Бул бағдарда бир қатар нызам ҳәм қарарлар қабыл етилип, усы ҳүжжетлер тийкарында билимлендириў шөлкемлериниң материаллық-техникалық базасын беккемлеў, оларды жетик қәнигелер менен тәмийинлеў, олардың билимин жетистириў бағдарында бир қанша унамлы ислер әмелге асырылмақта.

Сөзимиздиң дәлийли ретинде, Нөкис районы Мектепке шекемги ҳәм мектеп билимлендириў бөлимине қараслы 31-санлы улыўма орта билим бериў мектебин атап өтсек орынлы. Мектеп райондағы «Ақманғыт» посёлка пуқаралар жыйыны аймағында жайласқан болып, 844 оқыўшы орнына мөлшерленген ҳәм 1998-жылда қурылып, пайдаланыўға тапсырылған. Быйылғы оқыў жылында мектептеги 544 оқыўшы-жасларға 54 тәжирийбели оқытыўшылар тәлим-тәрбия берип келмекте.

Бүгинги күнде мектептиң коридорларын, текшелерин (лесница) ҳәм бос турған ханаларында пардозлаӯ, краскилеў жумыслары алып барылды ҳәмде оқыўшылардың билим алыўы ушын шәраятлар жаратылды.

Нәтийжеде имараттың бос турған ханаларын ижараға бериў арқалы мектептиң раўажландырыўшы есап бетине қосымша қәрежет табыў бойынша бир қанша жумыслар әмелге асырылған.

Атап айтқанда, Мәмлекет мүлки объектлеринен нәтийжели пайдаланыў орайының Қарақалпақстан Республикасы аймақлық басқармасы, ижараға алыўшы Даўлетмуратов Тимур 2023-жыл 12-октябрь сәнесинен баслап, репититорлық жумысын алып барыў ушын оқыў орайы болып шәртнама тийкарында мектептиң бос турған ханаларынан пайдаланбақта.

Буннан тийкарғы мақсет жоқары ҳәм питкериўши класс оқыўшыларын мектептен тысқары билимлендириўге тартыў, оларды қосымша таярлаў арқалы билимлерин асырып барыўдан ибарат.

Оқыў орайында район аймағындағы көпшилик орынларынан ҳәм мектеплерден оқыўшылар келип таярланбақта.

Бир неше жылдан берли Нөкис районы жасларының Жоқары оқыў орынларына кириў көрсеткиши бойынша алдыңғы қатарларда болыўына мектеп жәмәәти ҳәмде мектепте шөлкемлестирилген оқыў орайының орны гиреўли.

Нөкис районы Мектепке шекемги ҳәм мектеп билимлендириў бөлимине қараслы 31-санлы улыўма орта билим бериў мектебин 2021-2022 оқыў жылында 23 оқыўшы питкерип, соннан 14 оқыўшы (60,8%), 2022-2023 оқыў жылында 19 оқыўшы питкерип, соннан 17 оқыўшы (89,4%) жоқары оқыў орынларына кирип, студент болыўға мияссар болған.

Ҳақыйқатында да, «устазы күшлиниң устамы күшли» дегениндей өз исиниң жетик маманлары жумыс ислеп атырған бул мектепте оқыў процеси үлкен жуўапкершилик пенен алып барылып, аўыл халқының ертеңги күнге деген исенимин беккемлемекте.

Демек, ҳәр бир инсан мектепте алған билими ҳәм устазлар тәрбиясы тийкарында өмир деп аталған гүзар жолға атланады. Бул жолларды сүрникпестен басып өтиўде шаңарақта ҳәм мектепте алған билим ҳәм тәрбия үлкен әҳмийетке ийе. Солай екен бул дәргайды қәстерлеп абайлаў ҳәр биримиздин миннетли ўазыйпамыз есапланады.