Búgin, 11-noyabr kúni bilimlendiriw tarawında alıp barılıp atırǵan reformalarǵa orınlardaǵı keń jámiyetshiliktiń múnásibetin úyreniw, fizikalıq hám yuridikalıq shaxslardıń múrájatların orınlarda sheshiw, mektepke shekemgi shólkemlerde hám ulıwma orta bilim beriw mekteplerinde toplanıp qalǵan mashqalalar, múrájatlar hám usınıslar, bilimlendiriw mákemeleriniń Maqsetli kórsetkishlerin belgilep alıw, Korrupciyaǵa qarsı gúresiw boyınsha úgit-násiyat jumıslarınıń ámelge asırılıwı hámde puqaralardıń múrájatlarına sheshim tabıw maqsetinde Nókis qalası hám Moynaq rayonında kóshpeli qabıllaw ótkerildi.

Aldın xabar bergenimizdey, Qaraqalpaqstan Respublikası Mektepke shekemgi hám mektep bilimlendiriw ministri Kojabaeva Gulistan Talasbaevnanıń basshılıǵında Nókis qalası Ch.Abdirov kóshesi 2-jay, MShMB bólimi májilisler zalında hám  Ministriniń birinshi orınbasarı Dauletbaev Oybek Umirbekovichtiń basshılıǵında bolsa, Moynaq rayonı «Jayhun» APJ Bozataw kóshesi 21-jay, 3-sanlı ulıwma orta bilim beriw mektebinde ótkerildi.

Kóshpeli qabıllawǵa rayon(qála) aymaǵında jasawshı puqaralar, ata-analar, pedagog xızmetkerler, taraw basshıları hám keń jámiyetshilik wákilleri qatnastı.

Kóshpeli qabıllawda aymaq turǵınlarınıń mashqalası hám mektepke shekemgi shólkemlerde hám ulıwma orta bilim beriw mekteplerinde toplanıp qalǵan mashqalalar, múrájatlar hám usınıslar, olardı inventarlar menen támiyinlew, bilimlendiriw mákemelerinde qurılıs-ońlaw jumısları, klass komplektleri, jumıs penen támiyinlew hámde baslawısh klass oqıwshıların keytring usılında azıq-awqat ónimleri menen támiyinlew boyınsha isbilermenlerdiń qalaberse, mektep direktorlarınıń dа múrájatları kórildi.

Sonday-aq, múrájatshılardıń múrájatları usı jerdiń ózinde úyrenip shıǵılıp, puqaralardıń basqa da mashqalaları boyınsha bergen sorawlarına tiyisli huqıqıy túsinikler berildi. Al, ayırım múrájatlar tiyisli tártipte kórip shıǵılıp, orınlanıwı qadaǵalawǵa alındı hám tiyisli taraw basshılarına anıq tapsırmalar berildi.

Ótkerilip atırǵan qabıllawlar dawamında puqaralardıń kúndelikli turmısında ushırasıp atırǵan mashqalalar unamlı sheshimin tabıwı bul iygilikli isler olardıń abadan turmısın támiyinlewge, búgingi kúnnen razı bolıp jasawına xızmet etetuǵını menen de áhmiyetli.