Бүгин улыўма орта билим бериў мектеплери, Президент билимлендириў мәкемелери агентлигине қараслы мектеплер ҳәм академиялық лицейлердиң оқыўшылары арасында тийкарғы пәнлер олимпиадасының III (Қарақалпақстан Республикасы) басқышы басланды.

Илаждыӊ ашылыў мәресиминде Қарақалпақстан Республикасы Министрлер Кеңеси Баслығының орынбасары Б.Өтемуратов, Мәлимлеме технологиялары ҳәм коммуникацияларын раўажландырыў министрлигиниң аймақлық басқармасы баслығы Т.Баекеев, Қарақалпақстан Республикасы Мектепке шекемги ҳәм мектеп билимлендириӯ министриниң биринши орынбасары А.Даулетбаевлар шығып сөйлеп, барлық қатнасыўшыларды қызғын  қутлықлап, жақсы тилеклерин билдирди.

Сондай-ақ, Республикалық билимлендириӯ орайы директоры Қ.Жубанов олимпиаданыӊ әдалатлы ҳәм әшкаралық жағдайында өткерилиўи ушын ҳәмде оқыўшылардың еркин, өзлериниң билимлерин толық сынақтан өтиўин тәмийинлеў мақсетинде аудиториялар, керекли оқыў қураллары менен тәмийинленип, барлық шараятлар жаратылғанлығын, ҳәттеки, оқыўшылардың ата-аналары ҳәм оқытыўшылар ушын олимпиада өткерилетуғын орынларда шараятлар жаратылып, узақ районлардан келген оқыўшылар ушын жатақханалар ажыратылғанлығын атап өтти ҳәмде бәрше қатнасыўшыларға табыслар тиледи.

Соныда атап өтиӯ орынлы, Өзбекстан Республикасы Президентиниң 2017-жыл 5-июльдеги «Жасларға байланыслы  мәмлекетлик сиясаттың нәтийжелилигин арттырыў ҳәм Өзбекстан Жаслар аўқамы жумысын қоллап-қуўатлаў ҳаққында»ғы қарары тийкарында ҳәм «Камалак» балалар шөлкеми жумысын қоллап-қуўатлаў мақсетинде, 2023-жылдың 30-октябрь ҳәм 3-ноябрь күнлери аралығында Ташкент ўәлаяты Бостанлық районындағы балаларды саўалландырыў орайында «Сәрдарлар форумы» өткерилген еди.

Оған қатнасқан республикамыздың оқыўшы жаслары форум даўамында өткерилген ҳәр қыйлы таңлаў ҳәм викториналарда өзлериниң шаққанлығы, зийреклиги ҳәм билимин көрсетип, 100 млн. сум жеңип алды ҳәм оқыўшыларға шөлкемлестириўшилер тәрепинен 100 млн. сумлық ваучер тапсырылды. Мине усы «Сәрдарлар форумы»ның қатнасыӯшысы да бүгин пәнлер олимпиадасына қатнасыӯшыларға әӯмет тиледи.

️Еслетип өтемиз, пәнлер олимпиадасыныӊ III Қарақалпақстан Республикасы басқышына 1333 оқыўшы 5 пәннен өзара беллеседи. Жеӊимпаз болған 11-класс оқыўшылары Өзбекстан Республикасы басқышына қатнасыў ушын жоллама алады.