2023-jıl 11-oktyabr kúni Kegeyli rayonı Mektepke shekemgi hám mektep bilimlendiriw bólimine qaraslı 1-sanlı ulıwma orta bilim beriw mektebinde Qaraqalpaqstan xalıq jazıwshısı, belgili kinoscenarist, dramaturg, Berdaq atındaǵı mámleketlik sıylıqtıń laureatı Muratbay Nızanov penen ushırasıw keshesi bolıp ótti.

Ushırasıw keshesinde Muratbay Nızanovtıń jańadan baspadan shıǵarılǵan «Kegeyli» atlı kitabınıń prizentaciyası ótkerildi.

Ushırasıw keshesine Nuraniy xorı Kegeyli rayonlıq bólimi baslıǵı T.Davletov,  mektep ata-analar komiteti baslıǵı Sh.Panaev, Qaraqalpaqstanǵa miyneti sińgen jurnalist P.Xojamuratova, Kegeyli rayonı ruwxıylıq bólimi baslıǵı B.Matekov, Xalıq deputatları Kegeyli rayonlıq Keńesi deputatı U.Utegenov, Kegeyli rayonı «Maǵzam iyshan» imam kotibi  hámde bir qansha rayonımızǵa miynetleri sińgen nuraniylar qatnastı.

Dóretiwshilik jumısları dawamında Muratbay Nızanov búgingi kúnge shekem eliwden aslam kitaplar, tańlamalı shıǵarmalarınıń on tomlıǵı, «Qaraqalpaqlar» kitabınıń eki tomlıǵı hám basqa da dóretpeleri menen xalqımızdıń súyikli jazıwshısına aylanǵan.

Xalqımız Muratbay Nızanov degendi esitken waqıtta qaraqalpaq xalkınıń milliy ózine tánligin, xarakterin kórsetip beretuǵın kórkem hám hújjetli filmlerdi de kóz aldına keltiredi. Toǵız kórkem film, qırqtan aslam hújjetli film, tórt multfilmniń scenariy avtorı, «Túlkishek» balalar jurnalınıń shólkemlestiriwshisi bolǵan jazıwshı qaraqalpaq kino ónerinde de óziniń belgili ornına iye.

Oqıwshılar menen soraw-juwap formatında ótkerilgen ushırasıwda Muratbay Nızanov házirgi waqıttaǵı óziniń dóretiwshilik jumısları haqqında maǵlıwmatlar berdi.

Ushırasıwda jazıwshı óziniń dóretiwshilik jumısları, ustazları, qaraqalpaq ádebiyatı haqqındaǵı oy-pikirleri, aldaǵı maqsetleri haqqındaǵı pikirleri menen bólisti.

Oqıwshılar jazıwshınıń jańadan baspadan shıǵarılǵan «Kegeyli» atlı kitabı tuwralı sonday-aq, yumor-satiralıq shıǵarmaları, «Eki dúnyanıń áweresi» saxnalıq shıǵarması, televidenie arqalı efirge berilgen «Máwrit» kórsetiwi, jazıwshınıń basshılıǵında súwretke alınǵan kinofilmler haqqında ózlerin qızıqtırǵan sorawlarǵa juwaplar aldı.