Búgin 10-oktyabr kúni Respublikalıq «Bárkamal áwlad» balalar mektebinde «Bárkamal áwlad» balalar mektepleri jumıslarınıń nátiyjeliligin asırıw hám olarda zamanagóy dógerekler xızmetin jolǵa qoyıw» atamasında oqıw-seminarı shólkemlestirildi.

Onda Qaraqalpaqstan Respublikası Mektepke shekemgi hám mektep bilimlendiriw ministrliginiń sektor baslıǵı T.Bayjanov, Respublikalıq «Bárkamal áwlad» balalar mektebiniń direktorı w.w.a. Q.Ismailov hám Qaraqalpaqstan Respublikası «Bárkamal áwlad» balalar mektepleriniń direktorları, pedagog xızmetkerler, taraw basshıları, keń jámiyetshilik hám ǵalaba xabar quralları wákilleri qatnastı.

Oqıw-seminardı shólkemlestiriwdegi maqset – mektepten tıs bilimlendiriwdi joqarı basqıshqa alıp shıǵıwdan ibarat.

Ilaj dawamında mekteptiń jas háweskerler dógeregi aǵzaları tárepinen tayarlanǵan koncert baǵdarlaması jıynalǵanlar názerine usınıldı.

Soń qatnasıwshılar Respublikalıq «Bárkamal áwlad» balalar mektebinde alıp baralıp atırǵan dógerek jumısları hám mekteptegi oqıwshılar ushın jaratılǵan sharayatlar menen tanıstı.

Bul oqıw-seminarda qatnasıwshılar sektorlarǵa bólinip, onda oqıwshılardıń mektepten tısqarı bos waqıtların mazmunlı ótkeriwge baǵdarlanǵan ilajlar hám olardıń ótkeriliw tártibi, ilajlardıń respublikalıq basqıshlarında erisilgen nátiyjeler, mekteplerde oqıw metodikalıq jumıslarınıń jetilistiriwi boyınsha ámelge asırılıp atırǵan jumıslar, «Bárkamal áwlad» balalar mekteplerinde monitoring jumıslarınıń alıp barılıwı hám tiykarǵı kórsetkishler kestesiniń toltırılıwı boyınsha hám de «Bárkamal áwlad» balalar mektepleriniń pedagog-xızmetkerlerin qánigeligin asırıw barısında ámelge asırılatuǵın jumıslar hám aldaǵı wazıypalar tuwralı túsinikler berildi.

Sonday-aq, oqıw-seminarda «Bárkamal áwlad» balalar mekteplerindegi dógereklerdiń jumısı, oqıwshılardı qamtıwı, byudjetten tıs qarjı tabıw boyınsha pikirler de aytıldı.

Oqıw-seminar dawamında rayon(qala)lıq «Bárkamal áwlad» balalar mektepleriniń esabatları tıńlandı.

Oqıw-seminarda qatnasıwshılar ózleriniń qızıqtırıp júrgen sorawlarına juwaplar aldı.