Sońǵı jıllarda bilimlendiriw tarawında júrgizilip atırǵan reformalar nátiyjesinde ustazlardıń jámiyetimizde tutqan ornı hám abırayı artıp, bilimlendiriw mákemelerinde tálim-tárbiyanıń sapası jaqsılanbaqta.

Ásirese, keleshegimiz bolǵan jas áwlad wákillerine jaratılıp atırǵan qolaylı sharayatlar nátiyjesinde, olar respublikalıq hám xalıqaralıq kólemde ótkerilip kiyatırǵan pánler olimpiadası, sport jarısları hám tańlawlarda jaqsı kórsetkishlerge erisip, óz jaqınların quwanıshqa bólemekte.

Ózbekstan Respublikasınıń 2019-jıl 10-maydaǵı «Mámleketlik – jeke menshik sherikshilik haqqında»ǵı 537-sanlı tastıyıqlanǵan Rejegene tiykarlanıp, búgin 10-oktyabr kúni Nókis qalasında «Kardar academy schooll» mámleketlik emes jeke menshik mektebiniń ashılıw máresemi bolıp ótti.

Onda Qaraqalpaqstan Respublikası Joqarǵı Keńestiń komitet baslıǵı Sh.Ótemisov, Nókis qalası hákimi A.Daniyarov hám Qaraqalpaqstan Respublikası mektepke shekemgi hám mektep bilimlendiriw ministri G.Kojabaevalar imarattıń ashılıw saltanatı menen mektep jámáátin hám oqıwshılardıń ata-anaların qızǵın qutlıqladı.

Ilaj qatnasıwshıları mekteptiń ishki xanaları, oqıwshılarǵa jaratılǵan sharayatlar menen tanıstı.

Maǵlıwmat ushın aytıp ótiwimiz kerek, mekteptiń qurılıs-ońlaw jumısları ushın 3 mlrd 076,0 mln. swm qarjı ajıratılǵan bolıp, qurılıs jumısları ámelge asırıldı.

Búgingi kúni bul mektepte 300ge jaqın oqıwshı, óz isiniń mamanları bolǵan tájiriybeli muǵallimlerden zaman talabına say bilim almaqta. Mektepte inglis tilinen C1 hám B2 dárejesindegi sertifikatlarǵa iye pedagog xızmetkerler balalarǵa bilim bermekte.

«Kardar academy schooll» mámleketlik emes jeke menshik mektebinde inglis tili shet tili sıpatında tereńlestirilib oqıtıladı.

Sonday-aq, mektepte sabaqtan tısqarı qıtay, koreys hám túrk tilleri, matematika hám mental arifmetika, shaxmat hám shashka, miliy hám zamanagóy oyınlar dógerekleri shólkemlestirilgen.