Ózbekstan Respublikası Prezidentiniń 2021-jıl 9-dekabr kúngi «Jańa Ózbekstan» massivlerin qurıw hám aymaqlardıń sociallıq-ekonomikalıq rawajlanıwın támiyinlew haqqında» ǵı PP-32-sanlı pármanına muwapıq, “Jańa Ózbekstan” turaq jay massivlerin qurıw boyınsha joybarlar islep shıǵılıp kóp qabatlı turaq-jaylar, injenerlik-infrastruktura jánede social taraw obektlerin jaylastırıw máseleleri úyrenilip, «Esim» mákan puqaralar jıyınınan 10,0 ga jer maydanı tańlap alındı.
«Jańa Ózbekstan» massivin payda etiw boyınsha Qaraózek rayonında 2022-2024-jıllar aralıǵında kóp qabatlı úy-jaylar salınıwı rejelestirilip, 330 orınlıq ulıwma orta bilim beriw mektebin imáratın salıw rejelestirilgen edi.
Nátiyjede 2-sanlı ulıwma orta bilim beriw mektebi imáratınıń qurılıs jumısları qolǵa alınıp, tolıq pitkerildi.

Usı jıldıń 9-oktyabr kúni usı mektep imáratınıń ashılıw saltanatı bolıp, oǵan rayon hákimi U.Utambetov, Qaraqalpaqstan Respublikası Mektepke shekemgi hám mektep bilimlendiriw ministri G.Qojabaeva, nuraniy ustazlar menen muǵállimler hám oqıwshılardıń ata-anaları qatnastı.

Onda shıǵıp sóylewshiler bilimlendiriw tarawına qaratılıp atırǵan itibar, ulıwma orta bilimlendiriwde oqıwshılardı erkin pikirlewge baǵdarlaytuǵın Mámleketlik bilimlendiriw standartları, oqıw baǵdarlamaları hám oqıw rejelerine kiritilip atırǵan ózgerislerdi atap ótip, bárshe qatnasıwshılardı jańa mekteptiń ashılıwı menen qızǵın qutlıqladı.

Bunnan soń, miymanlar mekteptegi oqıwshılar ushın jaratılǵan sharayatlar menen tanısıp shıqtı.

Mekteptiń qurılıs jumısların “Turtkul agrotemiryul tamir” JShJ ti alıp barıp, paydalanıwǵa tapsırdı.