Qońırat rayonındaǵı Mádeniyat sarayında rayonlıq Mektepke shekemgi hám mektep bilimlendiriw bólimi hám de rayon hákimligi menen birgelikte «Sıpatlı bilimlendiriw – kúshli jámiyet» súreni astında bilimlendiriw tarawı xızmetkerleriniń «II Ustazlar milliy forumı» ótkerildi.

Ilajda rayonlıq Mektepke shekemgi hám mektep bilimlendiriw bólimi xızmetkerleri, bólim baslıqları, metodistleri, mektep direktorları hám de barlıq mekteplerden tájiriybeli pedagoglar qatnastı.

"II Ustazlar milliy forumı"n ótkeriwdegi maqset – jańa oqıw jılı aldınan bilimlendiriw mákemeleriniń ótken oqıw jılı dawamında erisken nátiyjelerin hám kemshiliklerdi talqılaw, alda turǵan wazıypalardı belgilep alıwdan ibarat.

Forum dawamında bir qatar nuranıy ustazlarǵa alǵısnamalar hám estelik sawǵaları tapsırıldı. Sonday-aq, «Shet tillerin oqıtıw boyınsh eń jaqsı mektep» tańlawınıń rayonlıq basqıshı jeńimpazları bolǵan mekteplerdiń oqıwshıları hám olardı oqıtqan ustazları rayon hákimligi tárepinen qarjılay sıylıqlandı.

«II Ustazlar milliy forumI» rayondaǵı 53-sanlı ulıwma orta bilim beriw mektebinde sekciyalar boyınsha jumıs alıp barılıp, taraw xızmetkerlerine jańa oqıw jıli aldınan bir qansha wazıypalar belgilep berildi. Forum sheńberinde ótkerilgen sekciya májilislerine tájiriybeli oqıtıwshılardan trenerler bekitildi.

Sekciya májilislerinde bilimlendiriw processine engiziletuǵın oqıw reje, oqıw baǵdarlaması hám sabaqlıqlardaǵı ózgerisler pedagog xızmetkerlerge jetkerilip, muǵallimlerge málimleme kommunikaciya texnologiyaları, elektron resurslar hám multimedia qurallarınan paydalanıw boyınsha usınıslar berildi.