Búgin Bozataw rayonı Jaslar orayı imaratında Mektepke shekemgi hám mektep bilimlendiriw bólimi tárepinen “Sıpatlı bilimlendiriw – kúshli jámiyet” uranı astında bilimlendiriw tarawı xızmetkerlerınıń rayonlıq “II Ustazlar milliy forumı” bolıp ótti.

Forumda Bozataw rayonı hákimi K.Allaniyazov, rayonlıq mektepke shekemgi hám mektep bilimlendiriw bólimi baslıǵı M.Tadjetov hámde nuranıy ustazlar qatnastı. Bunda jańa 2023-2024-oqıw jılında isleniwi tiyis wazıypalar hámde belgilengen rejeler haqqında aytılıp ótildi.

Forum dawamında 2022-2023-oqıw jılında jetiskenliklerge erisken pedagoglar hám tárbiyashılarǵa húrmet jarlıqları hám bahalı sawǵalar tapsırıldı.

"II Ustazlar milliy forumı" rayonımızdaǵı 1-sanlı mektepte sekciyalar boyınsha jumıs alıp barılıp, taraw xızmetkerleriniń aldına kóplegen wazıypalar qoyıldı. Milliy forum sheńberinde ótkerilgen sekciya májilislerine trenerler hám tájiriybeli muǵallimler tartıldı.

Sekciya májilislerinde bilimlendiriw procesine engiziletuǵın oqıw reje, oqıw baǵdarlaması hám sabaqlıqtaǵı ózgerisler pedagog xızmetkerlerge jetkerilip, muǵallimlerge málimleme kommunikaciya texnologiyaları, elektron resurslar hám multimedia qurallarınan paydalanıw boyınsha usınıslar berildi.