Qaraqalpaqstan Respublikası Mektepke shekemgi hám mektep bilimlendiriw ministrliginiń májilisler zalında korrupciyaǵa baylanıslı jaǵdaylardıń aldın alıwǵa baǵıshlanǵan ilaj bolıp ótti.

Ilajdı Qaraqalpaqstan Respublikası Mektepke shekemgi hám mektep bilimlendiriw ministri orınbasarı N.Baltabaeva alıp bardı.

Ilajǵa Qaraqalpaqstan Respublikası Prokuraturasınan A.Qıpshaqbayev, Qaraqalpaqstan Respublikası Ádillik ministrliginen A.Otewliyev, Qaraqalpaqstan Respublikası Mektepke shekemgi hám mektep bilimlendiriw ministrliginiń Korrupciyaǵa qarsı gúresiw kompleans qadaǵalawın ámelge asırıw boyınsha bas qánigesi Sh.Babanazarova hám de rayon (qala)lıq Mektepke shekemgi hám mektep bilimlendiriw bólimi baslıqları hám mektep direktorları qatnastı.

Ilajda joqarıda atı atalǵan miymanlar shıǵıp sóylep, mámleketimizde korrupciyaǵa qarsı gúresiw baǵdarında júrgizilip atırǵan jumıslar hám korrupciyanıń unamsız aqıbetlerine toqtap ótti. Bunnan soń, májilis qatnasıwshıları da shıǵıp sóylep, jámiyetimizge jat bolǵan bul unamsız illetten awlaq bolıw boyınsha ózleriniń pikir-usınısların bildirdi.

Korrupciya hár qanday jámiyettiń sociallıq-ekonomikalıq, mánawiy turmısına qáwip salatuǵın, ásirese, bilimlendiriw sapasınıń tómenlewine, usı tarawdıń rawajlanıwına tosqınlıq etetuǵın illet esaplanadı. Bul illetke qarsı gúresiw bárqulla áhmiyetli máselelerden bolıp kelgen.