Búgingi kúnde muǵallimshilik maqtanıshlı hám oǵada juwapkershilikli kásip. Elimizde bul kásip iyelerine húrmet-izzet kórsetiw menen birge óziniń jumısına jáne de sadıqlıq hám pidayılıq penen qatnas jasawdı, keń hám zamanagóy aqıl-oy iyesi bolıwdı talap etpekte. Hár bir adamnıń kámil insan bolıp jetilisiwinde ustazlardıń ornı ayrıqsha bolǵanlıǵı ushın da, barlıq ellerde hám barlıq xalıqlarda hár bir insan óz ustazın atasınday sıylap, húrmet kórsetedi. Mine, usınday ustazlardıń biri paytaxtımızdaǵı 20-sanlı ulıwma orta bilim beriw mektebiniń matematika páni muǵallimi Rametova Sholpan oqıwshılarǵa 13 jıldan berli bilim berip kelmekte.

Ustazımızdıń órnek alatuǵın tárepleri júdá kóp. Ol oqıwshılarǵa bilim menen birge ómirde sabırlı hám óz ústinde kóp isleӯdi, ilim hám bilim iyelew jolında tımbay miynet etiw kerekligin aytıp keledi.

Ustazımız Sholpan apa kóplegen shákirtlerdi tayarlap, pánler olimpiadalarında onıń tayarlaǵan oqıwshıları sıylı orınlardı iyelep kelmekte.

Atap aytatuǵın bolsaq,  2022-2023-oqıw jılında ótkerilgen pánler olimpiadasında matematika páni boyınsha 11-klass oqıwshısı  Amangeldieva Jaziyra qalalıq basqıshta 1-orındı iyelegen bolsa, respublikalıq basqıshta sıylı orındı iyeledi.

Hár qanday tarawdıń rawajlanıwı, insan oy-órisiniń bayıwı negizinde, álbette ilim boladı. Ustazımızdıń ilimge bolǵan qızıǵıwshılıǵı sebepli Qazaqstannıń xalıqaralıq  ilmiy-metodikalıq  “Dodern teacher” jurnalında “Matematika sabaǵında jańa texnologiyalardan paydalanıw” atamasındaǵı  ilimiy maqalası járiyalandı. 2020-2021-oqıw jılında bolsa, ulıwma orta bilim beriw mektepleriniń pán muǵallimleri arasında “Tematikalıq jobalar boyınsha onlayn slaydlar” kórik tańlawınıń Qaraqalpaqstan Respublikalıq basqıshında 1-orındı iyeledi hám 1-dárejeli diplom menen sıylıqlandı.

Sonday-aq, BMSh tárepinen birinshi márte shólkemlestirilgen xalıqaralıq ilimiy jumıslar tańlawında “Eń jaqsı ilimiy maqala-2023” nominaciyası menen sıylıqlandı.

Ustazımızǵa aldaǵı jumıslarında tasqın tabıslar tilegen halda elede bunnanda kóp jetiskenliklerge erisiwine isenim bildirip qalamız.

Uzaqbergenova Nilufar

QMUniń Qaraqalpaq filologiyası hám jurnalistikası fakulteti Málimleme xızmeti hám jámiyetshilik penen baylanıslar baǵdarınıń 2-kurs studenti