«Imaratlardıń ishinde eń ullısı mektep bolsa, kásiplerdiń ishindegi eń ullısı ustazlıq» degen edi oyshıllardıń biri.

Ustaz túsinigi keń, kólemi tuńǵıyıq, shıńı kóz jetkizbeydi. Elimizde bul kásip iyelerine húrmet-izzet kórsetiw boyınsha misli kórilmegen ibratlı is-háreketler pedagoglardan óziniń jumısına jáne de sadıqlıq hám pidayılıq penen qatnas jasawdı, keń hám zamanagóy aqıl-oy iyesi bolıwdı talap etpekte.

Xalqımızda elge úlgi, xalqına ádiwli bolǵan ustazlar kóp. Solardıń biri búgingi sóz etpekshi bolǵan ustazım Nókis rayonı xalıq bilimlendiriw bólimine qaraslı 10-sanlı ulıwma orta bilim beriw mektebiniń qaraqalpaq tili hám ádebiyatı páni muǵallimi Qanniyazova Jańagúl Jienbaevna. Ol 1976-jılı 1-yanvar kúni Nókis rayonında dúnyaǵa keledi.

Qanniyazova Jańagúl 2001-jıldan berli rayondaǵı 10-sanlı ulıwma orta bilim beriw mektebinde oqıwshılarǵa bilim berip kelmekte. Bul jıllar dawamında ustazım bir qansha shákirtlerdi tárbiyalap shıǵardı. 2021-2022-oqıw jılında Jańagúl apanıń shágirtleri oqıwshılar arasında ótkerilgen pánler olimpiadalarında sıylı orınlardı iyelewge eristi.

Atap aytatuǵın bolsaq, 11-klass oqıwshısı Orazbaeva Shahnoza pánler olimpiadasında qaraqalpaq tili hám ádebiyatı páni boyınsha rayonlıq basqıshta 1-orındı iyelep, Respublikalıq basqıshqa jollama alıp sıylı orındı iyeledi. Házirgi kúnde bul shákirtleri Joqarı oqıw orınlarında oqıwın dawam etpekte.

Sonday-aq, oqıwshılar arasında kitapqumarlıqtı en jaydırıw maqsetinde hár túrli tańlawlar shólkemlestirip, oqıwshılardı kitapqa qızıqtırıp kelmekte.

Ustazımnıń hár bir aytqan sózi, óz ornı menen keltirgen mısalları hár bir insanǵa úlken tárbiyalıq áhmiyetke iye. Ustazımnan hár bir insan úlgi, órnek alatın tárepleri júda kóp dep oylayman. Sózimdi juwmaqlap aytatuǵın bolsam, ustazıma birinshi gezekte bekkem densawlıq, shańaraǵına amanlıq hám baxıt, súrip atırǵan mazmunlı ómiri uzaq dawam etiwin tilep, aldaǵı jumıslarına tasqın tabıslar tileymen.

Uzaqbergenova Nilufar

QMUniń Qaraqalpaq filologiyası hám jurnalistikası fakulteti Málimleme xızmeti hám jámiyetshilik penen baylanıslar baǵdarınıń 2-kurs studenti