Ҳәзирги ўақытта шет тиллерин үйрениўге болған талап артып баратырғаны сыр емес. Әсиресе, инглис тили пүткил дүнья жүзинде илим тили сыпатында тән алынған. Сол себепли, инглис тили бойынша мектеп оқытыўшыларын тәжирийбесин арттырыӯға кеңнен тартыў, сырт елли қәнигелер басшылығында үйренген оқытыӯ методикасын мектеплерде ен жайдырыӯ мәселеси күнниң баслы ўазыйпаларының бирине айланбақта.

Усындай заманласларымыздың бири пайтахтымыздағы 37-санлы айырым пәнлер тереңлестирип өтилетуғын мектептиң инглис тили пәни муғаллими Абдирова Бибизада. Ол Япония мәмлекетиниң билимлендириў, мәденият, спорт, пән ҳәм технологиялар министирлиги тәрепинен 2023-жылы ушын өткерилген МЕХТ программасы арқалы Өзбекстан бойынша 1-орынды ийелеп, Япония мәмлекетине 2023-жылы октябрь айынан баслап 1 жыл 6 айлық педагог кадрлар ушын оқыў саяхатына барыўға мияссар болды.

Бул программаға Өзбекстан Республикасының барлық инглис тили пәни оқытыӯшылары арасында 3 басқышлы таңлаӯы болып өтти ҳәм Абдирова Бибизада грант жеңимпазы болыӯға еристи.

Абдирова Бибизада 2022-жылы өткерилген «Жылдың ең жақсы шет тили муғаллими» қалалық басқшында сыйлы III орынды ийеледи. Халықаралық IELTS (7 балл) ҳәм APTIS for Teachers С1 сертификатларына ийе болды. Ал, Халық билимлендириӯ тараӯындағы педагог кадрларға министр жамғармасы ушын өткерилген тест сынақларынан 97,50 балл топлап, жоқары көрсеткишке еристи.

Сондай-ақ, Халық билимлендириў министирлигине қараслы ДТМ тест орайы тәрепинен өткерилген билим конликпесин анықлайтуғын тестен жоқары көрсеткишлер менен 15% үстемеге ийе.

Соны айрықша атап өтиӯ орынлы, қаҳарманымыз Бибизада «Жылдың ең жақсы шет тили муғаллими-2016» көрик таңлаўында сыйлы 1-орынды ийелеп, Уллы Британия мәмлекетиндеги Шотландияның Глазгоу қаласындағы Glasgow Caledonian университетинде тәжирийбе алмасып қайтты.

Бизде өз гезегинде заманласымызға алдағы жумысларында табыслар тилеп қаламыз.