Ózbekstan Respublikası Prezidentiniń Qaraqalpaqstan Respublikasına saparı dawamında berilgen tapsırmalar hám 2022-jıl 25-fevral kúni ótkerilgen Qaraqalpaqstan Respublikasın jedel rawajlandırıw, anıqlanǵan mashqalalardı saplastırıw is ilájları haqqındaǵı 16-sanlı bayanı tiykarında Qanlıkól rayonı «Qosjap» APJ aymaǵındaǵı 4-sanlı ulıwma orta bilim beriw mektebine 2022-jılı joybar smetalıq bahası 2 mlrd. 763 mln 469 mıń 250 swmlıq iri ońlaw jumısların alıp barılıp, zárúr inventarlar jetkerilip berilgen edi.   

Mámleketimizde 2023-jıl «Insanǵa itibar hám sapalı bilimlendiriw jılı»nda belgilengen áhmiyetli wazıypalar, atap aytqanda tálim-tárbiya  sistemasın basqıshqa alıp shıǵıwda mektepte tálim alıwı dawamında oqıwshılardıń bir kásip hámde eki shet tilin úyreniwlerin shólkemlestiriw boyınsha Ózbekstan Respublikası Prezidenti tárepinen alǵa súrilgen baslamalardı ulıwma orta bilim beriw mekteplerinde keńnen engiziw ilájların kóriw maqsetinde Qanlıkól rayon hákimi orınbasarı hám Xalıq bilimlendiriw bólimi baslıǵı basshılıǵında ulıwma orta bilim beriw mektepleriniń direktorları qatnasında rayonlıq 4-sanlı mektepte shólkemlestirilgen «Oqıwshılardı kásipke úyretiw»  orayında  islenip atırǵan  atırǵan jumıslar barısı tanıstırıldı.

Mektepte ustaz pedagoglar tárepinen oqıwshılarǵa tereń tálim-tárbiya beriw menen bir qatarda olardı kásipke úyretiw jumısları álle qashan baslanıp ketkenligi kórildi. Atap aytqanda, er balalar ushın aǵashqa hám temirge islew beriw usılları,  kompyuter dizayn dógeregi, al qız balalar ushın qol ónermentshiligi yaǵnıy toqıw, pishiw, quraq qurap úyreniw dógeregi, nan hám nan ónimlerin islep úyreniw dógeregi, súwret salıp úyreniw dógeregi, kitapxanlıq dógeregi, inglis hám nemec tillerin úyreniw dógerekleri óz jumısların alıp barmaqta.

Sonday-aq mektep janındaǵı teplicada jer tayarlanıp, ol jerge piyaz egilgeni, pomidor, qıyar, bolgar burıshı tuqımları arnawlı ıdıslarǵa salınıp egilip qoyılǵanı, rayxan myata gúlleriniń nállerin tuqımnan jetistiriw usılları menen pikir almasıldı.

Tájiriybe almasıwǵa kelgen mektep direktorları mektepte oqıwshılardı kásip ónerge hám shet tillerin úyreniwge baǵdarlaw boyınsha alıp barıp atırǵan jumıslardı bir qatar kózden ótkerip ózleriniń mekteplerinde alıp barılıp atırǵan jumıslardı usı alǵan tájiriybesi tiykarında elede jetilistiriw pikirlerin atap ótti. Tájiriybe almasıw jumısları qızıqlı hám mazmunlı bolıp ótti.