Бүгинги күнде улыӯма орта билим бериӯ мектеплерде оқыўшылардың заманагөй билим ийелеўи менен бирге белгили бир  кәсипке  бағдарлаў бойынша бир қатар унамлы жумыслар әмелге асырылмақта.

Қанлыкөл районында усы бағдардағы алып барылып атырған жумыслар мақтаўға турарлық.

Атап айтқанда, оқыӯшы жасларды кәсипке бағдарлаӯ, ҳәр бир мектеп питкериӯшилериниң келешекте белгили бир кәсиптиң маманы болып шығыӯына жол-жоба көрсетиӯ мақсетинде райондағы 1-санлы айырым пәнлер тереңлестирилип оқытылатуғын класслары бар улыӯма орта билим бериӯ мектебинде көргизбели семинар болып өтти.

Семинарға районлық халық билимлендириӯ бөлими хызметкерлери ҳәм улыӯма орта билим бериӯ мектеплери директорлары қатнасты. Қатнасыӯшылар мектеп оқыўшылар менен сәўбетлесип, олар ушын жаратылған шараятлар менен танысты.

Айтыў орынлы, мектепте оқыўшы-жаслар усташылық, шет тилин үйрениў, тигиўшилик, саз асбаплар шертиӯ, қосық айтыӯ, миллий аяқ-ойынлар ҳәм кондитер өнимлерин писириў сыяқлы жөнелислер бойынша кәсипке бағдарланбақта. Буннан тысқары, мектеп аймағында дийқаншылық өнимлерин жетилистириў жөнелислери бойынша да кәсип үйретиў белгилеп алынған.