Өзиниң сийрек гезлесетуғын шығармалары ҳәм айрықша ойлап табыўлары менен илим менен мәденияттың раўажланыўына шексиз үлес қосқан уллы ойшыл ҳәм энциклопедист-алым, Биринши Ренессанс дәўириниң жарқын ўәкили Әбиў Райхан Берунийдиң туўылғанына 1050 жыл толыўы мүнәсибети менен оның бай мийрасын келешек әўладқа үгит-нәсиятлаў мақсетинде Тахтакөпир районындағы 3-санлы улыўма орта билим бериў мектебинде "Уллы Беруний мийрасы" атамасында кеше болып өтти.

Кешеге дин ислери бойынша комитетиниң Тахтакөпир районы бойынша бас қәнигеси Ислам Абдижамилов, Мәлимлеме китапхана орайының қәнигелери, мектеп муғаллимлери ҳәм оқыўшы-жаслар қатнасты. Кешени мектептиң үгит нәсиятшысы  М.Изимбетова басқарып барды.

Кешеде шығып сөйлеўшилер уллы инсанның мәңги өлмес мийраслары ҳаққында айтып берди. Оқыўшылар тәрепинен Абу Райхан Берунийдиң өмири ҳәм дөретиўшилиги бойынша мағлыўматлар келтирилди.

Буннан соң  Берунийдиң өмир жолы ҳаққындағы видеокөринислер қойып берилди.

Кешеде Мәлимлеме китапхана орайы тәрепинен  китаплар көргизбеси шөлкемлестирилди.